Mga tanom nga tambal (2)

Sumpay kini sa nangaging unang isyu sa mga tanom nga tambal.

1-BALIMBING (Hilanat) - Pagkuha’g pipila ka buok dahon niini, unya pabukali o laga-a. Unya huwata mabugnaw nga init-init pa. Ibanyos kini sa masakiton. Buhata kaduha ka beses sa usa ka adlaw, hangtud mawala ang hilanat. Mahimo sad ipabugnaw nga ihaklap sa agtang ang labakarang pinug-a’g linaga, kun walay magamit nga yelo o ice.

2 - BANABA (Hilanat) - Pagkuha’g peraso sa panit sa banaba, ug dokdoka kini hangtud mapino. Butangi og usa ka kutsaritang dinukdok nga panit ang usa ka basong tubig nga nagbukal. Takobi ug pasagdi sulod sa 10-15 ka minutos. Inig kabugnaw ipa-inom sa masakiton.

3-AHOS (Hayblad) - Pagpanit og pipila ka lusok sa ahos ug ituslob sa init nga tubig. Kaona ang 2-4 kalusok ini, idungan kada ting kaon sa pamahaw, sa paniudto ug sa panihapon. Pero di kini maayo nga permi gamiton kun dunay sakit sa ulcer. (Nalanag o nahilo)-Pagkuha’g tibuok ulo sa ahos unya sunoga. Dukdoka nga mapisat og maayo, unya isagol sa tunga (1/2) sa basong tubig ug ipainom. (Pangatol o Pangagod)- Paniti ang usa ka ulo sa ahos ug tadtara og maayo. Unya ikuskos sa parte nga nangatol- 2 ka beses sa usa (1) ka adlaw. (Sakit sa ulo)- Pagdukdok og 1-2 ka lusok  ug imasahe sa sentido. Unya ighuman itapal kini sa agtang. (Sakit sa ngipon)-Pagdukdok og 1 ka lusok sa ahos. Ibutang sa nagsakit o lungag sa ngipon. Ilisi kada 2 ka oras kun sakit pa.

(Rayuma) – Pagdukdok og ubay-ubay nga ahos. Painiti kun gikinahanglan nga itapal o ihaklap sa apektadong parte, 2 ka beses sa adlaw hangtud mamaayo.