Gusto’ng idonar sa asawa ang iyang kabtangan

Dear Atty. Divine,

Dunay ko’y pangutana may labot sa akong properties. Duna ko’y tulo ka anak sa una nako nga pamilya. Sa diha nga namatay ang akong unang asawa, akong gibahin ang among properties sa akong mga anak. Naminyo ko karon og usab ug kasado kami sa akong ikaduha’ng asawa. Wa makauyon ang akong mga anak sa akong pagminyo. Duna ko’y yuta ug balay nga gusto unta nako nga idonar sa akong second wife, mahimo ba ni nako nga buhaton nga bisan buhi pa ko akong idonar niya ang property? Maneguro lang ko nga may share g’yud siya unya sa akong properties kay basin og dili siya bahinan sa akong mga anak. Unsa may maayo nako nga buhaton? - Roy

* * *

Dear Roy,

Ubos sa atong Family Code, gidid-an ang magtiayon sa pagdonar sa usa’g-usa. Buot ipasabot nga ikaw dili ka makadonar og butang sa imong asawa ug ang imong asawa dili ‘sab mahimo nga modonar og butang nganha kanimo. Kini basi sa Article 87  nga nagkanayon: “Every donation or grant of gratuitous advantage, direct or indirect, between the spouses during the marriage shall be void, except moderate gifts which the spouses may give each other on the occasion of any family rejoicing. The prohibition shall also apply to persons living together as husband and wife without a valid marriage” (Family Code of the Philippines).” Ang maayo nimo nga buhaton mao na lang ang pagbilin og Last Will and Testament aron pagseguro nga mabahinan g’yud ang imong ikaduha’ng asawa sa imong kabtangan. Hinuon basi sa balaod ang legal nga asawa ug bana dili mahimong mahikawan sa pag-inherit sa ilang kapikas tungod kay makonsiderar sila nga compulsory heirs. - Atty. Divine

* * *

Alang sa inyong pangutana, ipadala lang sa Legal Corner sa Banat News  sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.