Mailad ba ang mga Sugbuanon?

Wala ba kamo mahibulong nganong nagbalikbalik si Bise Presidente Jejomar Binay sa Sugbo bisan makapila niya wala tungaha ang imbitasyon sa Senado nga mutambong aron tubagon ang mga pasangil nga kurapsiyon ug ill-gotten wealth?

Higala nako sa Manila nagkanayon nga ang Sugbo maoy gitan-aw sa kampo ni Binay nga anhi mamuntos sa 2016 presidential election.

Unsa?

Nagtuo na lang gyud diay kini si Binay nga mailad niya ang mga Sugbuanon mao nga nagbalikbalik siya dinhi ug nakig-boodle fight og kaon sa mga kabus ug mga kawani sa gobiyerno sa Tabo-an, Bantayan ug Tabuelan.

Maayo tingaleng pahinumdoman nato si Binay nga ang mga Sugbuanon adunay kaugalingong “utok” ug dili madala sa iyang taktika nga “appel to the emotions” sa mga botante dinhi. Dili madala uy!

Nasayod si Binay nga mismo ang mga taga-Manila miila sa mga Sugbuanon nga mga “intelligent voters.” Sa 2004 nga presidential election, kinsa kanilang Gloria Arroyo ug Fernando Poe Jr. ang midaog sa Sugbo? Nagpadala ba gud kita sa kasikat ug ka-popular ni FPJ?

Nganong si GMA man ang gipili sa mga Sugbuanon? Kini tungod kay anaa sa hunahuna natong mga botante nga kun papilion kita sa artista ug ekonomista, mas mapili ang naulahi kay sa nag-una nga walay kabangkaagan sa panggobyerno. Apan sa asawa ug sa anak niini, gipanghimaraot ang mga Sugboanon nganong dinhi napilde si FPJ.

Nakadaog ba si Erap Estrada dinhi?

Igo na ba ni Binay nga dili niya maesplikahan ang mga Sugbuanon sa iyang mga kaso sa kurapsiyon, daghang condo ug mansion, hacienda ug aircondition nga baboyan? Madawat lang ba sa mga Sugbuanon ang iyang pagtubag niini pinaagi sa kaunkaon sa mga kabus?

Kun wala na sa Sugbo si Binay, makigkaun ba kaha siya sa mga kabus? Makig-unong ba kaha siya sa iyang mga trabahante sa farm nga nagpuyong kabus itandi sa iyang mga baboy nga nagpuyo sa de aircon nga lugar?

Kun mapresidente na siya, mobalik kaha si Binay sa Tabo-an, Tabuelan ug Bantayan aron balikon ang pakigpangaon sa mga kabus? Ambot lang?

* * *

Nagmalampuson kagahapon ang Weapons Retraining: M16 Re-familiarization Course sa mga sakop sa 1901st Ready Reserve Infantry Brigade sa Kamagong Firing Range, Camp Lapu-Lapu, Lahug, dakbayan sa Sugbo.

Si Col. Erik Miguel Espina, brigade commander sa 1901 RRIBde pormal nga mibukas sa training sa kapin sa 30 ka mga Army Reservists. Didto usab ang Executive Officer sa 1901 RRIBde nga si Lt.Col. Guy Gabison III. Ang trainors mga sakop sa Kamagong Gun Club mao silang Dr. MSgt. Tyrone Mercader, Dr. MSgt. Manny Barcenas, SSgt John Mercader, SSgt. Andy Chua, Sgt Adonis Quitoy ug uban pa.