Ang balaud sa kahimsog

Importante kaayo nga makabaton kita’g hingpit nga kahibalo, mahitungod niining mga gilatid nga balaud alang sa atong maayong panglawas. Busa atong isulod sa kaisipan nga tinguhaon gayud nga ato kini nga mabuhat:

1. NUTRISYON - Ang ka mahinungdanon nga angay tutokan ang hustong mga masustansyadong pagkaon. Pagmatngon nga di magpataka’g kaon, angay nga igo lang ang kaunon basta motultol sa oras. Likaye ang subra sa parat, tam-is, mantikaon ug maoy kaunon permi ang prutas, utanon o isda.

2. EHERSISYO - Ang paglakaw, pagsayaw, ug uban nga gaan lang nga ehersisyo. Di na kinahanglan ang pakusog o pabug-at, basta palihuka lang ang tibuok lawas kada adlaw sulod sa 30 mins. Ngadto sa 45mins. Kun maanad na.

3. TUBIG - Ang pag-inom kanunay og tubig, gikan sa 8 ngadto 12 ka baso (1ka baso (250ml) kada 7 ka kilong timbang). Mas daghan mas maayo aron tin-aw ang ihi.Anama pag-inom gikan sa pagmata sa buntag hangtud alas 9pm.

4. SILAW SA ADLAW - Magpainit sa adlaw sa mga oras sa 10am- 2pm. Kun pution o mestisuhon, 5-10 mins lang. Kun tabunon o morena, 10-15mins. Kalkuloha lang nga igong mainitan ang lawas mo. Buhata kini kada adlaw.

5-PAGPUGONG - Kalma o relaks lang nga di masuk-anon nga mora’g permi gihayblad, kay makaapektar kana sa panglawas mo.

6-HANGIN – Kanunay mohanggap og lab-as nga hangin sa kahoyan o kabaybayonan. Ipraktis permi mohingos- ibuga ang lawom nga pagginhawa.

7-PAGSALIG SA DIOS – Ang pangaliya ug hugot nga paglaum sa Dios, maoy gamhanan nga makahatag kanato sa kahimsog sa panglawas.