Plano ray abunda
Ang labing dakong problema sa P19 bilyones nga budget sa 2015 nga gisumiter ni Cebu City Mayor Mike Rama sa City Council di ang mayoriya sa Bando Osmeña-Pundok Kauswagan (nga iya untang gisuwayan pagbungkag apan igo lang naibanan og tulo; ug kun tuohan ang mga huhungihong, mahimong mapun-an og tulo sa mga alyado ni Rama sa mosunod nga mga adlaw).
Kun dili ang kakuwang sa pundo nga nakolekta ni Rama gikan sa buhis ug ubang tinubdan sa panalapi sa dakbayan. Ang upat na ka tuig nga pamunoan ni Rama nakamatuod sa kaabunda sa iyang giplanong mga proyekto. Ug sa kanihit og mga ideya unsaon pagpalambo ang panudlanan sa dakbayan.
* * *
Di na makapasangil si Rama sa mga konsehal nga nisabotahe sa iyang mga proyekto pagpalambo sa dakbayan. Kay ang paglaslas sa konseho sa iyang budget sa nangaging katuigan wa manukad sa pamolitika, kay nahibawo ang mga konsehal nga sila’y panghimarauton sa mga botante tungod sa popularidad ni Rama, kun dili tungod sa kapakyas ni Rama ug sa iyang department heads pagmatuod nga may igong pundo pagpatuman sa mga proyekto.
Napamatud-an sa nangaging katuigan nga bisan ang linaslasan nga budget wa mahurot paggasto ni Rama. Daghan uyamot nga mga proyekto ni Rama sa 2011, 2012 ug 2013 ang wa mapatuman hangtod karon. Kay, segun sa iyang department heads, wa makab-ot ang target nga koleksiyon sa buhis ug busa nahurot nang pundo.
* * *
Nga mao na say nahitabo karong tuiga. Usa ka buwan na lang ang nahibilin sa 2014, may dul-an sa P2 bilyones pa nga balor sa mga proyekto, nga aprobado na sa konseho ug busa nakarga sa 2014 budget, nga wa pa mapatuman.
Nipasabot si City Engineer Jose Marie Poblete nga nalangay ang mga proyekto tungod sa problema sa road right of way acquisition (RROWA), nga nanukad sa pagdumili sa mga tag-iya pagpagamit sa pribadong mga luna alang sa proyekto. Nikumpisal sab si Poblete nga wa mapatuman ang pipila ka proyekto tungod sa kakuwang sa pundo.
* * *
Ang P19 bilyones nga budget nga gisugyot ni Rama sa 2015 maoy labing dako sa tanang local government units sa tibuok Pilipinas. Mas dako pa kay sa P14.5 bilyones nga budget nga gisugyot sa Quezon City. Ang tinubdan nga gisaligan ni Rama sa ambisyuso niyang budget mao ang itlog nga wa pa mapusa.
Kay bisan makabaligya pa og luna sa South Road Properties sunod tuig, way seguro mabayran ba dayon. Kay kasagarang paagi sa pinalitay og luna mao ang pag-data lang una og katunga sa tibuok presyo. Di katabang ang kasinatian ni Rama sa pagbaligya og luna sa Lahug karong tuiga. Wa mahingpit ang transaksiyon kay gikiha silang Rama ug kaubanan.
* * *
- Latest
