EDITORYAL - Pinoy Isis?

Gisusi karon sa intelligence community sa Armed Forces of the Philippines, Philippine National Police ug National Bureau of Investigation ang report nga usa sa mga migulgol sa liog sa 18 ka Syrians nga mga sundalo ug piloto usa ka Filipino.

Mikatap sa web ang usa ka video nga nagpakita sa mga sundalong Syrians nga gipalinya nga nagluhod ug diha sa ilang mga likod ang mga sakop sa Islamic State of Iraq and Syria (ISIS) nga nagsul-ob og digital desert camouflage nga sa kataposan migulgol sa mga liog sa mga sundalo.

Ang report miingon, usa kanila mga Filipino ug ang uban mga taga Uropa, matud pa sa tigpamaba sa AFP, taktika kini sa ISIS aron ipakita sa kalibutan nga daghan nang mga nasud ang misuporta sa ilang kawsa.

Ang security forces sa Pilipinas mihimo na og subsob nga background checking sa maong “Filipino Jihadist” kung tinuod ba kini.

Apan base sa mga nanggawas nga mga reports gikan sa nagkalain-laing news reports gikan sa Syria, mas dako kaayo ang posibilidad nga ang maong “Asian-looking jihadist” naggikan sa mga silingang nasud sa Pilipinas nga Indonesia o Malaysia nga dili layo og dagway sa mga Filipino.

Didto sa Malaysia, dunay gitukod nga Katibah Nusantara Lid Daulah Islamiyyah. Mga Malay-speakers (gikan sa Indonesia ug Malaysia) ang mga sakop niini nga gipadala sa Syria.       

Sa maong mga nasud usab nag-operate ang Jemaah Islamiyah. Ang JI mas kwartahan ug dunay kapabilidad tungod sa ilang koneksyon sa al-Qaeda.

Ang Abu Sayyaf dunay kapabilidad paghimo og linoog nga krimen, apan wala sila’y kwarta aron makaabot didto sa Middle East.

Apan dili angay magkompiyansa ang AFP tungod kay kun tinuod nga nakadawat og P250 milyones nga ransom ang grupo bugti sa magtiayong German nationals, posibleng dunay makaadto kanila sa Middle East.