EDITORYAL - Walay kapuslanan nga proyekto

Gipadak-an ug gipalawman sa Department of Public Works and Highways (DILG) ang drainage system kon kanal nga nahimutang sa tiilan nga bahin sa Veterans Drive, ang karsada nga paingon ngadto sa Marco Polo Plaza Hotel.

Kun magtan-aw ka sa dako ug lawom na nga kanal, makaingon ka nga sulbad na g’yud tingali ang paglunop ug pagbaha diha sa eskena Gorordo Avenue ug Salinas Drive panahon nga kusog ang uwan.

Apan dili mahitabo nga masulbad ang lunop-baha diha sa mao nga dapit pinaagi lang sa mao nga drainage system. Samtang dako ug lawom ang gihimo’ng kanal, ang pangutana, asa man moagas ang tubig?

Makasapar ba nga agian sa bul-og sa tubig-baha ang gagmay gihapon nga drainage system sa ubos nga bahin sa gipadak-an nga kanal sa ibabaw?

Dili kaha mapuno lang gihapon sa mga lapok ang lawom nga kanal nga gihimo sama sa nahitabo sa ubang mga dapit dinhi sa dakbayan? Gigamit kaha sa taga DPWH ang ilang utok sa pagmugna sa mao nga proyekto?

Angay’ng hinuktokan kini pag-ayo sa mga opisyal sa DPWH aron dili sila mapasanginlan nga nag-apas lang sila nga adunay mamugna nga proyekto apan walay kapuslanan.

Susama ra kini sa gihimo sa dakbayan nga paggasto og milyon-milyon ka pesos sa pagpalawom kunohay sa kasapaan apan ang tinuod gausik lang kay ang bukana nga bahin wala nila unaha sa pagpalawom.

Resulta, bisan hinay kaayo nga uwan maglunop gihapon ang kinapusorang bahin sa dakbayan sa Sugbo.