Kinsay naglangaylangay?

Usa ka tuig na ang nakalabay sukad mikuniskunis ang bagyong Yolanda sa Tacloban ug uban pa nga mga lugar sa Kabisay-an. Human sa bagyo, daghang tabang ang nangabot alang sa dinaliang mga panginahanglan sa mga biktima sa bagyo.

Na-isyu og kadiyot ang panagbangi tali sa nasyonal nga kagamhanan ug sa lokal nga kagamhanan sa siyudad sa Tacloban tungod sa matud pa dugay’ng pagpangabot sa mga tabang. Daghang nalabhan sa saway, lakip na ang mga opisyal sa nasyonal nga kagamhanan.

Gilalis ni Mayor Alfred Romualdez ang nasyonal nga kagamhanan tungod kay dugay nangabot ang tabang. Apan karon lang kong bag-o nasayod nga utro diay siyang wala’y gibuhat sa pag-igo sa bagyo tungod kay didto siya sa usa sa mga resort nga layo-layo sa sentro hinungdan nga wala niya masinati ang storm surge.

Pipila ka bulan ang nakalabay, gitudlo si kanhi Senador Panfilo Lacson isip rehabilitation czar.  Siyempre, siya man ang gitahasan ni Pres. Noynoy Aquino sa pagsuperbisar sa rehabilitasyon sa mga lugar nga naigo sa bagyong Yolanda.

Apan nahibulong ko nganong karong bag-o, nagreklamo gihapon si Romualdez nga wala gihapon mapatuman ang mga post-typhoon rehabilitation projects.  Giugkat sa mayor ang isyu kaniadto nga gipasulat siya ni DILG Secretary Mar Roxas aron mangayo og tabang.

Apan matud ni Lacson sa balita kagahapon sa Interaksyon online nga si Romualdez ang nagdumili sa pagkooperar sa nasyonal nga kagamhanan, ilabi na sa iyang buhatan alang sa rehabilitasyon, hinungdan nga wala mapatuman ang mga proyekto sa Tacloban.

Diay statement ni Lacson nga sagpa alang kang Romualdez: “I’m wondering why in the nearby municipalities, there are no issues involved. But in Tacloban, we are facing so many challenges.” Sa ato pa, ang ubang mga lugar wala’y problema sa mga rehabilitation projects, sa Tacloban ra gyud.

Ngano kaha kini?

Ngano kaha nga hangtod karon, ugkaton gihapon sa mayor ang isyu batok kang Roxas nga dili man si Roxas ang nagdala sa rehabilitation projects. Si Lacson man.

Dili masulbad ang isyu sa kalangay sa mga proyekto sa Tacloban kun sa laing tawo mupaghot si Romualdez. Si Lacson maoy angay niyang paninglan, dili si Roxas.

Ang trabaho sa DILG mao ang pagseguro sa kooperasyon sa Tacloban  isip  ka local government unit ug, kun wala ko masayop, ang pag-consolidate sa mga program of works and estimates (POWE) ubos sa supervisory power niini sa mga lokal nga kagamhanan.

Sumala sa balita, dili ganahan si Romualdez makabuylo ang mga proyekto sa administrasyon ni Aquino diha sa iyang teritoryo kay basin og mawala siya sa passing. Maayo kining kalakiha niya kay magamit pa sa iyang damgong mag-senador.