LTO-SM nakatabang g’yud

Bentaha na g’yud kaayo karon ang sestema sa Land Transportation Office (LTO) sa pag-renew sa lisensya kay paspas na.

Mipa-renew ko sa akong lisensya ug milinya g’yud gikan pa sa pagkuha og drugtest. Miadto ‘sab ko sa doktor ug nagpa-medical test ug milinya gihapon.

Dunay nakaila nako ug gusto nga ila ko’ng ipauna apan wala ko mosugot. Gituyo nako aron pagsuta kun unsa g’yud kadugay ang pag-renew sa lisensya nga walay  “palakasay.”

Dali na lang g’yud karon kay milanat ra man ang tanan og kapin sa duha ka oras diha sa LTO- Cebu City licensing center nga gidumala ni Atty. Vicente Gador Jr.

Air-condition ‘sab diha sa LTO-Cebu City ug dili ka singoton nga maghuwat. Apan nagpabilin nga dili gihapon mabentahaan ang kapaspas sa pag-atiman sa LTO-satellite office diha sa SM City.

Ang nakanindot kay ang LTO satellite office sa SM anaa sulod sa mall ug bugnaw kaayo mentras maghuwat ka. Busa kadtong mga gusto’ng mo-renew sa lisensya, misugyot ko nga mas nindot g’yud sa LTO-SM.

* * *

Kinahanglan g’yud nga ipakita ni Mayor Michael Rama ang iyang “political will” aron pangbungkagon kini’ng mga illegal structures nga nakababag sa pag-agos sa tubig diha sa ubay-ubay nga bahin sa Mahiga Creek mao nga maglunop g’yud kun may uwan.

Nakapanglingo-lingo ko nga nagtan-aw sa mga hulagway nga gipresentar atol sa Drainage Summit kaniadto’ng Miyerkules nga nagpakita sa mga illegal structures nga nakapagamay sa kasapaan.

Nahimo kini tungod sa katikasan ug kamapahimuslanon sa ubang mga tawo, apil ang pipila ka magpapatigayon, kang kansang mga balay ug building anaa gitukod daplin sa Mahiga Creek.

Kay nagtupad man kami paglingkud si Raquel Arce nga maoy hepe sa Prevention Restoration, Order and Beautification Enhancement (PROBE), nakahigayon ko sa paghagit nga mulihok g’yud siya aron nga panggub-on kini’ng mao nga mga illegal structures.

Angay nga si Mayor Michael Rama mupalihok na sa iyang mga sakop. Bisan og mag-unsa pa kita  sa pagpalawom sa sapa dili masulbad ang lunop.

Sayonan ka nga adunay bahin sa Mahiga Creek nga igo na lang makaagi ang tawo kay ang masi’g ka daplin gipangsemento man sa mga hakog kaayo’g lugar.

Kun ako pa’y mayor, ipabungkag dayon nako na. Apan husto si Mayor Jonas Cortes nga kinahanglan nga magtinabangay. Gihimo niya nga sanglitanan ang lima ka tudlo, nga kun imong kumkumon, mahimo kini’ng usa ka lig-on kaayo’ng kumo nga mahimo na nga ikasuntok.