Tanan dunay utlanan

Ang kahitas-an adunay gihatag kanato nga kinabuhi, lakip na niini ang kagawasan kun unsaon nga ato kini nga mahatagan og kahulugan. Aron kapahimuslan sa di pa muabot ang gitakdang mga panahon. O, ang tanang higayon o kalihukang adunay nagkadaiyang mga utlanan.

Sama sa pakigbisog ning kinabuhia, kun ikaw molunga na tungod sa kakapoy o luya na. Malagmit mao na kini ang imong utlanan, nga di ka na kaabot sa imong gitinguha. Kay nawad-an kana man sa paglaum. Nibahar man ang kaisog sa pagsuong sa mga pagsulay. Busa lig-ona ang kaugalingon.

Sa mga pangandoy, kun wala kita'y tinubdan sa paningkamot, mamasin la'g unsay muabot, wala'y pundasyon sa kinabuhi, dali ra mapukan ig-abot sa sungog sa kapalaran. Madismaya ka lang nga way klarong padulngan. Basig muabot ang utlanan, mausik lang panahon mo. Busa iseguro ang kaugmaon.

Apan luyo niining tanan, maangkon lang ang kalamposan kun kita may hugot nga pagsalig sa kaugalingon.

Pangayoon nato sa kahitas-an ang kahibalo nga mabatonan ang kusog nga maoy puhonan sa panlimbasug. Usa na niini ang kabililhon nga maampingan pag-ayo ang maayong panglawas.

Wala gayud kita'y mahimo bisa'g mapawot pa kitag sige'g basol ug hinulsol sa kaugalingon, kun di na gayud magamit ang masakiton ug inutil nga lawas. Sagad ra ba, mao pay pagkahiamggo kun wala nay higayon nga makahimo pa.

Busa, iprayoridad gayud ang kahimsog sa panglawas. Kay nakasandig dinhi ang tanang kahigayonan aron kita kapahimulos sa kabulahanan ning kinabuhia. Aron makapangandam ta, sa di pa muabot ang utlanan sa kinabuhi.