Politically motivated

Mao kini ang sagad pangatarungan sa mga elected officials nga akusahan og mga kahiwian sa ilang pagpanga-tungdanan.

Sagad kini nila itubag sa higayon nga sukit-sukiton na sila sa media, labi na karong panahona nga mibukal na ang kaldero sa politika, bisa’g layo pa ang election.

Politically motivated. Alang nila, nakatubag na sila sa mga accusation, pinaagi sa pagpanghimakak.

Apan, opinion sa pipila ka tigpaniid sa politika, politically motivated man o dili, kinahanglan moatubang ug motubag g’yud ang gipasanginlan, if only to clear their names.

Dili maglikaylikay, gawas kun may kaso na nga mapasaka ngadto sa hukmanan, diin makarason na sila nga adto na sila motubag sa proper venue.

Sayod man kita nga kun maghisgot ta’g hukmanan, abtan og tagpila ka tuig una sila makapagawas sa kukom.

Unya, mo-file dayon og Motion for Reconsideration ang hingtungdan ug ubang legal remedies nga usahay molungtad og daghang katuigan usa mahukmi… ug usahay moabot pa sa Korte Suprema.

Kini maoy rason nga mas gusto sila nga idiritso ang kaso ngadto sa “proper venue,” kay sa mga Congressional hearings. Kun mao kini ang mahitabo, mahuman na lang ang 2016 ug 2019 elections, di pa mahuman ang kaso, ug lagmit, ma-elected pa pag-usab ang pipila sa mga gikasohan.

Anyway, whatever, pahiuyon sa mga opinion sa uban, atubangon unta nila ang mga akusasyon, aron basin og ma-clear sila sa dili pa ang election. Kay matud pa, lisud atubangon ang giingon nga “bar of public opinion.” Lisud kun ang katawhan nay mohukom.

* * *

Dako’ng garbo sa atong nasud kining pagkatudlo ni Bureau Internal Revenue (BIR) Commissioner Kim Henares isip sakop sa United Nations Committee of Experts on International Cooperation on Tax Matters.

Sa ato pa, gi-recognize sa United Nations ang expertise ni Henares bahin sa buhis. Ang maong committee adunay 54 ka sakop, ug ato kining ikapasigarbo nga nalakip kita sa 54 ka sakop gikan sa nagkalainlaing nasud sa tibuok kalibutan.

Giingon dinhi, “the council is tasked with keeping under review the UN codes on taxation as well as tax treaties between developed and developing countries.”

So, paapil na ta sa kalihokan sa UN mahitungod sa pamuhis ug mga kasabutan nga mahimo tali sa ubang mga sakop sa United Nations. Matud ni Henares, ang iyang pagkatudlo makahatag usab kanato’g kahigayonan pagpalambo sa international tax cooperation tali sa ubang kanasuran.