Gibuking ni Robles

Maayo tingale nga atong pahalipayan ang Cebu Province, Cebu City, Mandaue City, Lapu-Lapu City ug ang Tacloban City, kay sa mga lokal nga kagamhanan, sila lang ang giingong nakasunod sa lagda sa public-private partnership framework sa mga proyekto nga giduso sa National Economic and Development Authority.

Uban kanila ang Pasay City ug Ilo-Ilo City.

Hain man diay ang ubang mga lungsod ug siyudad?

Sa pagsugod sa administrasyong Aquino, ang PPP maoy nahimo’ng signature strategy pagpatuman sa mga proyekto. Nakita kini nga malampuson, apan karon pa ko nahibalo nga diyutay ra diay ang LGUs nga misubay niini. Ngano kaha?

* * *

Ang pagkaguba sa popularidad ni Bise Presidente Jejomar Binay mugna sa mga isyu’ng iyang giatubang ug kuyaw kun magpabilin kini sa hunahuna sa mga botante hangtod sa adlaw sa eleksiyon sa 2016.

Mao ra unya kini ang moputol sa karera niya sa politika nga dugay na unta niya’ng gidamgo ug gipangandaman, kun dili gyud siya moatubang sa katawhan aron tubagon ang mga pasangil batok kaniya ug sa iyang pamilya.

Bisan giunsa ra ba og likaylikay ni Binay, gibuking siya ni Raissa Robles nga sa interbiyu niya sa pamantalaan sa Hong Kong, si Binay miangkon nga iyaha diay ang hacienda sa Rosario, Batangas nga adunay aircondition nga baboyan.

Unsaon kaha karon sa paghimakak ang interbiyu ni Robles nga aduna man g’yuy tape record sa tingog ni Binay nga miangkon nga iya ang luna sa Batangas, taliwa sa iyang panghimakak nga wala siya’y bahandi nga ingon kadako.

Akoy gikuyawan nga ang mabulahan hinuon sa pagkatibugsok sa popularidad ni Binay mao ang gika-intapan niya’ng kaatbang sa politika – si DILG Secretary Mar Roxas.

Kun mao kini ang mahitabo, masumpayan ang ilang panagsakbang sa 2010.

Si Roxas man unta ang bise presidente karon kun wala pa mosulpot kini si Binay tungod niadtong pakolo ni Senador Chiz Escudero nga “Noybi.”

Pun-an pa human sa eleksiyon sa dihang gi-eskutenyo na ang resulta, ang mga lugar diin kusog si Roxas gipangbabagan sa kampo ni Binay nga dili makuwenta, hinungdan nga si Binay ang milusot.

Human mapilde si Roxas, unsay iyang gibuhat? Nagpakahilom ra g’yud siya. Sa mga interbyu ni Binay, hambugero pa kaayo siyang mosaway kang Roxas nga iyang ingnon’g “bise presidenteng wa madayon.”  Wala g’yud mosukol sa mga bugalbugal ni Binay si Roxas.

Apan nagtuo ko nga sa pagpakahilom ni Roxas, nagtigum lang diay kini og kusog aron suklan og balik ang tawo nga nagdaugdaog kaniya.

Karon nga nagtibugsok ang rating ni Binay, mao kaha usab kini ang mo-aswat sa popularidad ni Roxas?

Atangan!