Dako nga kadaugan

Kudos na usab ngadto sa kapolisan sa ila’ng bag-o nga kalamposan sa kampanya batok sa ilegal nga druga.  Nagpasabot lamang kini nga nagkakusog na ang paggukod sa otoridad niadto’ng nalambigit sa mao’ng kalihokan.

Sa niagi nga semana, kapin sa P7 milyones nga shabu ang nakonpiska sa kapolisan sa dakbayan sa Sugbo sa duha ka managlahi nga operasyon sulod lamang sa 24 oras. Mao kini ang labing dako nga nasakmit sa kapolisan sulod na sa pipila ka tuig.

Sa una nga operasyon, nasikop ang usa ka magtiayon sa kapolisan sa usa ka buy-bust didto sa Barangay Lorega San Miguel. Dili momenos sa P1.18 milyones nga kantidad sa shabu ang nakuha gikan kanila.

Samtang niadto’ng Miyerkules sa hapon, usa ka giingon nga bigtime drug pusher ning dakbayan ang nasignit usab sa kapolisan atol sa usa ka buy-bust operation. Sa mao’ng operasyon didto sa Barangay Suba, subra sa P6 milyones nga kantidad sa gidili nga druga ang nasakmit sa otoridad. Angay lamang gayud nga pasidunggan ang otoridad niini’ng bag-o nila nga kalampusan. Dako kini nga kadaugan sa krusada batok sa nag-una nga kaaway sa komunidad karon nga mao ang ilegal nga druga.

Ug manghinaut kita nga gumikan niini’ng kalamboan, mokunhod ang suplay sa druga dinhi sa dakbayan. Kay klarong mobahag gayud ang ikog sa mga pusher ug sa mga nagpaluyo niini’ng ginadili nga negosyo.  

Hinuon bisan pa man sa gihingusgan nga kampanya sa otoridad, morag lisod na nga masilhig pa ang druga, dili lamang sa Sugbo kun dili sa tibuok nasud. Kini gumikan kay nakagamot na kini sa komunidad.

Gani bisan asa nga nasud, ang druga maoy usa sa nag-una nga problema. Kay lagi sa hilabihan ka daghan nga tiggamitan niini, walay duda nga ang negosyo sa ilegal nga druga maoy usa sa labing profitable sa kalibotan karon.  

Sa kampanya batok sa druga, gikinahanglan gayud sa otoridad ang dako usab nga suporta gikan sa komunidad. Basi sa nanglabay nga mga insidente, wala’y  operasyon sa kapolisan ang mulampos kun kulang kini sa suporta sa katawhan. Hinuon ang nakalabay’ng kalamposan sa kapolisan nagpamatuod lamang sa wala’y hunong nga paningkamot sa otoridad pugpuhag niadto’ng nalambigit sa negosyo sa druga.