Katungdanan sa CITOM

Alang nako, mahimo nga masayop ko, ang primary function sa CITOM, dili ang pagpanakop, kundili, aron kalikayan ang mga traffic violations.  Samtang atong angkonon nga kadaghanan sa mga drayber, ilabi na sa mga PUJ  ug taxi, mga 80 porsiyento tingali kanila, mga abusado. Sa ato pa, kinahanglan        dakpon.

Usa ka higayon diha sa Ayala Business Park, gikan ko sa usa ka bangko, nalipat ko, mi-left turn ko, wa ko kakita sa NO LEFT TURN nga sign. Diha’y taga-CITOM, iya ko’ng gisinyasan sa dili pag-turn left. Wa ko dakpa, kaylagi, wa man ko molahos pag-turn left.

Mao nay husto … dili kay mag-atang, motago pa ang uban, maghuwat nga dunay  violation. Alang nako, mao ni ang unang katungdanan sa CITOM, pagbantay nga kalikayan ang mga traffic violations.

Ako ning gihisgutan dinhi tungod kay pipila sa atong kahigalaan nga misugilon kanako nga nabiktima sila niining modus sa ubang mga traffic enforcer nga magpalayo sila sa mga junction nga gidili ang pag-turn left, adto maghuwat sa unahan, aron manakop sa mga mo-left turn.

Unta, adto g’yud sila magpahimutang sa kanto o sa eskina, aron badlongon kadtong buot mo-turn left. Mao ni ang una nila’ng katungdanan. Akong usbon, to avoid traffic violations, dili apprehension.

In the meantime, maghuwat ta kun duna na bay mahimo ang atong gobiyerno batok sa mga motorcyclist nga magpaturagas la’g padagan, saba kaayo ang mga tambutso, dili mosul-ob sa helmet, ug mag-overloading pa. Ambot ngano nga helpless man ang tibuok gobiyerno kanila?

Unya, nag-operation sila makadiyot batok sa mga PUJ nga dili magsuga magabii, dunay nadakpan nga pila ka buok, apan karon, balik na pud. Ambot ngano nga mag-off-and –on man ning ilang pagpatuman sa mga balaud sa trapiko? Mora man og ilang i-suspend ang mga balaud panahon sa kagabhion, as if walay violations during the night.

Only in the Philippines? O sa Cebu City ra? 

* * *

Ug sa gusto ta’g sa dili, misugod na pagbukal ang kaldero sa politika. In fact, dugay nang misugod, immediately after the last election. Ug mahitungod niini, si Atty. Romulo Macalintal, usa ka election lawyer, mipahimangno sa mga pumipili nga dili himoong popularity contest ang election. Mao usab kini ang atong panghinaut nga dili nato panamastasan ang kasagrado sa election, aron dili ta gabaan. Sumaa naunsa na ta ron.