Lihay-lihay ni Binay
Inay motarung pagtubag sa mga pasangil sa pangurakot batok niya, si Bise Presidente Jejomar Binay nisuway pagdangop og laing posibleng lusot sa apiki niyang kahimtang: Pagpintal sa “Oplan Stop Nognog in 2016” nga kampanya sa mga adunahan batok sa mga kabos. Kun magmalampuson, makumbinser ni Binay ang katawhan nga ang pakauwaw nga iyang mahiagoman bugalbugal sab batok sa kinabag-an.
Ang labing uwahing panagang ni Binay nitakdo sa gipatumaw nga imahe sa iyang kandidatura pagka presidente sa 2016: Nga siya’y kampeyon sa mga kabos, nga ang iyang mga away ilang away ug nga managsama gani katabunon ang iyang panit sa kinabag-ang kinahanglang mapagod sa init aron mabuhi.
* * *
May gamay hinuong buslot ang ilang linya: Nahinayak na pag-angkon ang mga tigpamaba ni Binay nga sila ra ang nag-umol sa ngan nga “Oplan Stop Nognog in 2016.” Nga nanukad sa ilang giingon nga pagsumpay-sumpay sa nagpadayong imbestigasyon sa Senate Blue Ribbon subcommittee ug sa ubang mga maniobra sa Liberal Party batok ni Binay sa iyang pamilya.
Sa ato pa, kun ang “Nognog” pag-insulto sa mga tabunon ug sa mga kabos, ang kampo ra sab diay ni Binay ang sad-an. Inay kampeyon sa masa, salamat sa nagbuntaog nga katigayonan nga natumpi bisan pagtrabaho ra sa gobiyerno ang panginabuhi, si Binay apil sab diay sa nakamenos sa mga kabos.
* * *
Human gihagit ni Senador Antonio Trillanes ang hagit sa debate, maglisod na si Binay sa pagsibog. Kay siya may nanghagit. Apan nitumaw nang mga timaan nga di diay ganahan si Binay nga makig-debate, bisan kun si Trillanes giisip nilang mas sayon nga lalison kay sa mas maayong manulti nga si Senador Alan Peter Cayetano:
Nanghudlat na si Binay nga kay ang debate himuon man gawas sa Senado wa nay immunity si Trillanes sa iyang mga pamakak; ug
Mga dumadapig ni Binay nagpulipuli na og pahibawo sa mga sakop sa media nga way kapuslanan ang debate nga gihikay na sa Kapisanan ng mga Brodkaster ng Pilipinas (KBP) kay nakaseguro silang mamakak na sab si Trillanes.
* * *
Human luwati og pormal nga imbitasyon sa Senate Blue Ribbon Committee, wa nay kapilian si Binay gawas sa pag-atubang sa sunod nga hugna sa imbestigasyon sa mga pasangil sa pangurakot batok niya karong Huwebes, Oktubre 30. Kay igo ra mang gituman sa pangu sa komitiba, Senador TG Guingona, ang kundisyon nga gipahamtang ni Binay.
Human sa pila ka buwang paglihay-lihay, mapugos na si Binay pag-atubang sa tulo ka senador nga iyang gilibak sa abunda uyamot nga mabulukong mga balikas, silang Trillanes, Cayetano ug Koko Pimentel, pangu sa subcommittee. Patambungon ba sang Binay ang iyang anak nga si Nancy Binay ug ubang alyadong mga senador aron magtinabangay pagdupa niya?
- Latest
