Balaod sa gugma

Ingon pa nila nga love is blind. Apan kun maghisgot kita og gugma ingon nga sugo sa Dios wala kini magpasabot og usa ka mapasagaron nga paghigugma. Hinunoa, gugma kini nga pinasikad sa hustong panghunahuna dinuyogan sa husto pud nga pagbati.

Ang atong gugma sa Dios gugma nga alang lang gyud kaniya nga atong gipadayag kaniya pinaagi sa paghigugma sa mas konkretong paagi ngadto sa atong mga isigkaingon.

Ang paghigugma sa atong isigkaingon mahatagan lamang og hustong pagmantala kun kita mismo ang nakasabot sa pulong gugma sanglit ato man kining gihatag usab sa atong kaugalingon. Walay bisan unsa nga mahatag nga wala nato mahupti.

Maayo apan dunay problema

Ni Lucky Malicay

Gumikan lagi sa grabe nga pagkatap sa krimen nga gikalambigitan sa mga kriminal nga nagsakay og motorsiklo, adunay proposed ordinance nga giduso karon sa hawanan sa Cebu Provincial Board nga nagdili sa riding in tandem dinhi sa probinsiya.

Ang mao nga ordinansa, nga gi-author ni Board Member Arleigh Sitoy, atua na karon sa PB committee on public safety ilawom ni Board Member Sun Shimura alang sa dugang nga pagtuon. Ug dako ang tsansa nga mahimo unya kini nga balaud.

Ilalum sa mao nga proposed ordinance, gidili ang pagsakay sa motor niadto’ng dili kauban sa pamilya o kaliwat. Kini aron pagsumpo sa krimen sama sa pagpatay, pagtulis ug uban pa gamit ang motorsiklo.

Hinuon susama kini’ng mao nga ordinansa ngadto sa bag-o nga nahimo’ng balaud didto sa Mandaluyong City  sa kaulohan. Gipasar ang mao nga ordinansa gumikan kuno sa nagsaka’ng krimen nga gikalambigitan sa mga tawo’ng nagsakay og motorsiklo didto sa mao nga dakbayan.

Apan daghan usab ang wala makaayon niini’ng mao’ng proposed ordinance ni Sitoy. Matud nila nga dako unya kini og epekto ngadto sa mga lumulupyo sa kabarangayan nga walay gisaligan nga transportasyon kun dili ang motorsiklo.

Makasimpatiya usab ako ngadto sa mga mulupyo sa lagyo nga mga lugar nga dili na maabot sa public utility vehicle. Kini tungod kay habal-habal lamang ang ila nga gisaligan sa ila’ng inadlaw nga pagbiyahe.

Ug kun mahimo na nga balaud kini’ng proposed ordinance ni Sitoy, unsa na lamang unya ang ila’ng kasakyan? 

Dili man usab mahimo nga ato na lamang sila’ng palakwon gikan sa bukid padulong sa lungsod.

Dili nato malalis nga dako unya og ikatabang kini’ng  mao nga ordinansa sa kampanya sa otoridad pagsumpo sa nagsaka’ng krimen sa lalawigan nga gikalambigitan sa mga nagsakay og motorsiklo.

Apan ang dako’ng problema mao nga daghan usab ang mapagan niini, ilabina niadto’ng atua nagpuyo sa layo nga lugar kinsa dili na unya makasakay og motorsiklo tungod kay mahadlok na lagi nga madakpan.

Siguro angay nga susihon pag-ayo sa PB ang mao’ng proposed ordinance. Walay kwestiyon sa ka maayo nga intensiyon niini. Apan hinaut nga dili usab kini magdala og puwerhisyo ngadto sa kinabag-an.