Kanhi pari nga mayor nanghingala'g 'gago'

Ang mayor sa Maribojoc, Bohol nga si Leoncio Evasco Jr. usa ka pari sa wala pa mahimo’ng rebelde. Pero siya ra’y pari nga nakapanghingalan og “gago” sa laing tawo, butang nga makapanglimbawot balhibo sa mga tinuroay’ng Katoliko.

Nahitabo kini human miduaw si DILG Secretary Mar Roxas sa Bohol niadto’ng Oktubre 15, tangkod usa ka tuig pag-igo sa 7.2 magnitude earthquake, ug nakapangasaba si Roxas sa mayor sa Clarin ug Sagbayan tungod sa kapakyas pagsumiter og program of works and estimates (POWE) sa mga post-earthquake projects bisan narelesan na sila og pundo gikan sa nasyonal nga kagamhanan.

Gikasab-an ni Roxas sila’ng Clarin Mayor Allen Piezas ug Sagbayan Mayor Ricardo Suarez, kay bisan ang Clarin narelesan og P51.8 milyones ug ang Sagbayan P216.7 milyones wala sila makatuman sa lagda. Ang Clarin wala g’yud makasumiter bisan usa ka POWE sa 15 ka proyekto, samtang ang Sagbayan tulo ra ka POWE ang nasumiter sa 65 ka proyekto.

Apan ngano’ng si Evasco man ang nanghingalan og gago kang Roxas nga dili man siya’y gikasab-an?

Palaaway g’yud tingale ning pari-a. Kun nahinumdom mo, si Evasco mao kadto’ng mayor nga mibabag nga dili makasulod sa iyang lungsod sa Maribojoc ang team sa Red Cross nga mo-distribute unta og relief goods ngadto sa mga biktima sa linog. Ang nahitabo, wala hinuoy hinabang ang iyang mga konstituwente tungod sa iyang pagkapalaaway.

Gusto ni Evasco nga ipadaplin lang ang mga guidelines aron madali ang mga proyekto human sa linog.

Mahimo ba gud diay ni, father? Kun mahimo na sa simbahan, dili na puwede sa gobiyerno. Kay matag sentimos nga ipagawas gikan sa kaban sa gobiyerno, nagkinahanglan kana og accounting kay kuwarta kana gikan sa buhis sa katawhan, dili kana gikan sa sibot nga wala na kinahanglana ang accounting.

Ang gusto’ng mahitabo ni Evasco nga i-release lang ngadto kanila’ng mga mayor ang budget gikan sa DILG nga walay POWE. Pastilan, dili intawon kini puwede uy.

Ang panghambog nga si Evasco kanhi chief of staff siya ug bisan dili siya enhinyero ug gihimo siya’ng department head sa engineering office sa Davao sa diha’ng nahimo’ng mayor si Rodrigo Duterte human sa Edsa revolution.

Sa ato pa, nasayod siya sa proseso sa gobiyerno. Apan kun naanad siya didto sa Davao nga basin mo-shortcut sa proyekto kaniadto, dili na intawon na mahimo karon kay estrikto ang gobiyerno tungod sa eskandalo sa pork barrel.

Apan tay’m pa ra gud, kun nakatuman ang mga mayor sa lagda sa DILG sa releasing sa pundo, ngano’ng wala man makatuman ang Sagbayan ug ang Clarin? Ngano’ng dili man gusto og guidelines sa proyekto si Evasco?