Batan-on nga natigulang

Ang subra nga pahindik o pag-atiman sa atong nawong o sa dagway, usahay mosangpot sa dili maayo. Ang ato ra bang nawong maoy tan-awon kun  batan-on ba kita. Lisud tuohan apan wa tingali kita makamatikod niini.

Sama sa akong amiga nga batan-on pa kaayo unya guwapa pa gayud. Adunay kapuyo nga tigulang nga sa akong paniid, mora’g maglisod nag serbisyo sa panginahanglan sa batan-ong kabit. Tagsa ra muari sa Cebu aron paghatud og konsumo. Tagtulo ra pud ka adlaw kay mobalik sa Mindanao.

Samtang wala ang lalake, wala gyud ni laing gikalingawan. Magkurikuri lang sa balay. Inig human, mahurot ang oras nga magsige la’g panamin. Mao ra gyud ni ang iyang paagi tingali aron di siya mingawon. Unya maluoy ko sa nawong niya kay way hunong paghapyud, bagnos, nusnosan sa likido kuno sa pagpahamis aron mobata og samot nga sud-ongon.

Tuod man, mosuroy makadiyot sa among nataran kay sikbit ra sa among balay ang giabangan nila. Haskan mura’g bata nga bag-ong natawo nga pula-pula ang iyang aping. Hangtud dihang nasakit ang inahan mibakasyon ni’g duha ka bulan. Pagbalik niya, ang nawong niya medyo nangunot na ug gipangtumtom o nalawos ang kahamis. Ang pula kaniadto karon sunog na nga bag-ong naalim.

Dihang nasakit nig ulser, sige ni’g ping-it sa tiyan, sud sa dugay panahon. Wala na maatiman ang nawong sukad niuli kini sa ilaha.

Namatay na ang kapuyo nga gihaya sa Cebu. Nagkita mi kadiyot sa haya. Halos wala ko kaila dayon niya. Usa ka batan-on kun imong pakalitan og tan-aw, tigulang na gyud tan-awon.  Busa pagmatngon sa gamitonon sa nawong basig mapareha ka niya.