Sipa nga sagpa
Haskang paspasa ni Cebu City Mayor Mike Rama nga nakapalayas sa mga molupyo daplin sa suba sa Mahiga. May abunda siyang sukaranan: Ilegal ang ilang pagtukod sa kabalayan, nakaiban sila kun wa man hingpit nga nakababag sa agianan sa tubig ug, labaw sa tanan, nameligro silang mabanlas kun modako ang baha o hingpit gyong moawas ang sapa.
Tinuod nga lahi nilang Tommy Osmeña, Alvin Garcia ug ubang nangaging mga mayor sa dakbayan, si Rama ray nangisog paghawan sa tampi sa Mahiga. Apan napandol dayon ang talagsaon niyang pasundayag sa political will dihang nabisto nga di pa diay andam, ni haom nga puy-an, ang gitanyag sa City Hall nga relocation sites.
* * *
Laing sagpa sa kampanya mao ang pagkabisto nga daghang higanteng buildings di lang sa daplin kun dili sa tungatunga gyod sa Mahiga ug ubang mga sapa. May pipila ganing nagpaugat pagliwag ug pagtabon sa sapa. Aron pagpanagang sa mga saway nga isog lang siya sa gagmay, gisugo ni Rama ang mga abogado sa City Hall pagmando sa mga tag-iya sa mga istruktura pagpasabot sa ilang kalapasan.
Inay gamitan og puwersa, nga maoy gihimo batok sa mga kabos, niawhag si Rama og boluntaryong demolisyon. Kay, sama ni Mandaue City Mayor Jonas Cortes, di siya andam nga mahigot sa kaso sa mosunod nga katuigan. Labi nang pipila sa nahilambigit nga mga negosyante nakaamot sa ilang kampanya.
* * *
Labing dakong tamparos sa kampanya ni Rama naggikan sa wa paabotang tinubdan: Si Mayor Cortes kinsa nangangkon nga wa nang kaagwanta sa pagsige og apura ni Rama pagguba sa gagmay’ng mga taytayan nga maoy gilatayan sa mga molupyo pagtabok sa Mahiga.
Gipahinumdoman ni Cortes ang tanang hingtungdan sa nangalisbong tinagoan nga nahibaw-an na sa kadaghanan: Ang ihawan sa Dakbayan sa Sugbo, gawas nga nakalapas sab sa gimando nga tulo ka metro nga hawan sa daplin sa sapa, padayong naglabay og hugaw nga nakapasamot pagmabaw sa Mahiga.
* * *
Pakapin na lang nga insulto ang pagpangolekta sa Mandaue sa nagbuntaog nga mga buhis nga giingon ni Mandaue City Treasurer Regal Oliva nga wa mabayri sa Cebu City Hall sud sa daghan nga uyamot nga katuigan. Nahibaw-an ni Cortes nga nahukman sa korte nga luna sa Mandaue ang gitukoran sa ihawan atol pa sa pamunoan ni OIC Cebu City Mayor pa si karon Toledo City Mayor John Osmeña.
Labing dakong insulto: Sa wa pa diay unta momando si Rama pagpalayas sa kabos nga mga molupyo, pagpa-esplikar sa mga negosyante ug pagkarakara sa taga Mandaue, giuna unta pagpanilhig ang mga sagbot sa iyang kaugalingong nataran. Labing una diay untang gikasab-an mao ang iya ug ang gisundang mga pamunoan. Ug labing una untang gipabalhin ang iyang kaugalingong ihawan.
- Latest
