EDITORYAL - Mga Pinoy kontra Ebola

Dunay mga planong mopadala og mga Filipino ngadto sa kontinente sa Africa aron makiggubat. Gubat dili gamit ang armas ug mga bala kondili medisina ug expertise aron batukan ang pagkatap sa Ebola virus.

 Gubat nga walay kasigurohan ang kalamposan tungod kay hangtud karon, daw naglakaw sa mangitngit nga dalan ang World Health Organization.

Isip sakop sa United Nations, dunay plano ang gobiyerno ug ang Philippine National Red Cross nga mopadala og mga medical personnel sa West Africa. 

Apan ang Philippine Medical Association ug Philippine College of Physicians mipadayag sa ilang kabalaka sa maong plano.

Niadtong  1950's nagpadala kita og squadron sa atong F-86 Sabre fighter jets ug mga fighter pilots ug ground crews ubos sa bandila sa United Nations didto sa Congo.  Kun kaniadto makita ang kalaban, ang Ebola way klaro sa unsang paagi motakboy, way garantiya nga way mataptan sa maong sakit.

 Miabot na og dul-an nuebe mil ang natakboyan niini ug dul-an 4,500 na ang nangamatay gikan sa Sierra Leone, Nigeria, Liberia, Guinea ug Kenya. Bisan ang Spain, Amerika ug Germany nalutsan na sa  maong virus.

Ang  WHO miingon nga kung way dugang  medical personnel nga motabang sa maong mga nasud, posibleng dili na makontrol ang maong virus, gibanabanang 10 mil ka tawo matag semana ang matakdan niini.

Ang mga nasud sa Southeast Asia maoy gihulagway nga labing preparado sa mga contagious diseases tungod sa eksperiyensya sa Severe Acute Respiratory Syndrome (SARS) ug Middle East Respiratory Syndrome Corona (MERS) virus.

Samtang maayo ang tumong niini, kinahanglang huna-hunaon gyud una kung kinahanglan ba gyung kita maoy moadto didto.