EDITORYAL - Pro ug Anti US magtigi na 'sab

Nameligro karon nga masusama sa kaso ni "Nicole" ug Lance Corporal Daniel Smith ang bag-ong kaso kalabot sa pagpatay sa usa ka US Marine ug sa "transgender" nga si Jeffrey Laude.

Mag-agi sa asido ang mga probisyon sa Enhanced Defense Cooperation Agreement (EDCA) ug Visiting Forces Agreement tali sa Pilipinas ug Amerika.

Gitinguha karon sa gobiyerno nga makuha ang kostudiya sa suspek nga si Private First Class Joseph Scott Pemberton, nga maoy gitumbok nga kauban sa biktimang si Laude sud sa usa ka motel sa Olongapo City niadtong Septiyembre 11, 2014.

Natural lang nga dinhi kini husayon ug kinahanglan dinhi ikostudiya ang suspek samtang nagpadayon ang imbestigasyon ug paghusay sa kaso.

Giingong mamahimo nga mohangyo ang Pilipinas apan ang Amerika maoy modesisyon kun ilaha bang ihatag si Pemberton.  Ang duha ka mga nasud nabutang karon sa nagkurus nga dalan, ang duha dili gusto nga mauwawan ang usa'g-usa ilabi na nga dunay mga mikwestyon sa tumong sa VFA ug EDCA.

Gipaabot nga duna g'yuy mahitabong imbestigasyon, husay ug uban pang normal nga proseso sa kaso. Apan dili kini garantiya nga maayo ang resulta sa dungog sa Pilipinas. Masagolan kini og politika, magtigi na usab ang pro-US ug anti-US military. Sa kasong rape kaniadto ni Nicole, wala makostudiya sa Pilipinas si Smith bisan nakombikto na sa korte niadtong 2006 kay miapelar sila sa kaso.

Paglabay sa dul-an upat ka tuig, nawad-an na og interes si Nicole ug miduso og affidavit nga di siya sigurado kun nalugos siya, ang Court of Appeals mibali sa desisyon ug gibuhian si Smith. Dunay report nga atoa na karon magpuyo sa gawas sa nasud si Nicole sa Amerika.

Ang Palasyo namahayag nga mas dako ang tumong sa VFA ug EDCA ug dili makaapektar ang maong kaso sa kasabotan sa duha ka nasud.