Negosyong way puhonan

Duna mi kasikbit sa among balay, nga intsek og suod kaayo sa among pamilya. Maayo’g batasan gani bisa’g kinoral og konkreto, kanunay mi tunolan og pagkaon ug uban pa.

Gani og dunay mga okasyon, ila sab mi imbitahon ug inig pauli may sekretong itunol nga sobre nga pula, nga may kuwartang sulod.

Matud nila, basta manghatag sila’g pulang sobre, suwertehon kuno sila sa negosyo. Pero kun may mangayo demalas kuno, busa kun mahimo balibaran nila kay sa sunod na nila hatagan. Apan ilang pasidan-an nga dili mangayo, ipasabot lang unsay kinahanglan aron mahatagan. Talagsaon, dili ba?

Makadaghan, ila kong gitambagan nga aron moasenso, kinahanglan nga magnegosyo. Mas maayong wa kay puhonan, aron maningkamot kang makaganansya. Ug di gayud maalkanse kay wa ka may puhonan. Ang problema unsaon pagnegosyo nga moasenso ka’s negosyo nga way puhonan.

Sa mga ideya nga gihatag nako sa intsek, kinahanglan kuno magpakita ka’g interest nga magnegosyo. Makighugoy kanila nga kasaligan ka ug maayo modiskarte sa mga tawo, aron maagni ang pumapalit nga malipayon kang moatiman isip higala ug kustomer.

Magpraktis ka sa ginagmay aron motubo.

Maantigo ka sab mopakunsoylo og serbisyo, nga magpaka-alkanse sa ganansiya ug ayaw gyud ibani ang puhonan nga gipiyal kanimo. Kay kun mabangkarota sa bisan unsang hinungdan, maguba na ang reputasyon mo ug wa nay purohan  mahatagan ka’g laing higayong katabangan ka sa negosyo.

Ang atong maayong hiyas o pagkatawo nga kasaligan, maoy mopalambo nga kahatagan kita’g tsansa nga modako ang negosyo nga way puhonan.