Tungod lang sa selos?

Makapakugang ang insidente sa lungsod sa Catmon sa amihanang Sugbo.  Nahimo sa usa ka amahan ang pagpatay sa iyang tulo ka anak nga nag-edad og 6, 4 ug mag duha pa ka tuig nga manghod.

Gilakip niya pagpatay ang iyang ugangan nga babaye. Ug human sa linuog nga pagpatay gamit ang kutsilyo, nagpatay ‘sab sa kaugalingon ang mao nga amahan. Nitumaw nga wa’y laing rason aron mahimo sa amahan ang pagkutlo sa kinabuhi sa iyang mga anak gawas sa selos ngadto sa iyang asawa.

Giingon’g dugay na’ng seloso ang bana ug kanunay nga magduda sa trabaho sa iyang kapikas ug sa mga kauban niini sa buhat. Apan igo na ba ang selos nga rason aron mahimo ang pagpatay bisan sa imong mga mahal sa kinabuhi?

Base sa pagtuon sa mga eksperto adunay tulo nga butang nga bantayan ang matag usa ka nato aron kalikayan ang grabe’ng selos. Una, ang ato’ng grabe’ng insecurity maoy makatukmod sa naghinobra nga selos.

Tambag sa mga eksperto nga inay tan-awon ang mga butang nga makapa-ubos sa pagtan-aw sa imong kaugalingon, mas maayo’ng himug-atan ang mga positibo’ng butang nga anaa nimo.  Ang grabe’ng insecurity mosangpot sa ubos nga pagtan-aw sa kaugalingon. Ug tungod kay ubos ang imong self-esteem, motumaw ang imong grabe’ng pagkaseloso ug magsugod na sa pagtandi sa imong kaugalingon ngadto sa uban.

Ang pagtandi sa imong kaugalingon ang laing rason ngano’ng mapukaw ug mabuksan ang imong grabe’ng pagkaseloso.

Ang maong matang sa pagbati nga itandi nimo ang imong kaugalingon sa uban, maoy maghatag nimo sa labi’ng sakit nga kamatuoran nga adunay mga tawo nga mas labaw pa nimo, mas guwapa pa, mas adunahan ug mas maayo pa nimo. 

Ug samtang nagduwa sa imong huna-huna ang ingon niini’ng kamatuoran, mas labi pa nimo’ng gibuhi ang grabe’ng selos. Tambag sa mga eksperto, himug-atan ang mga positibo’ng aspeto sa imong pagkatawo aron nga mas molig-on ang imong bilib sa kaugalingon.

Laing rason sa grabe’ng selos mao ang kahadlok nga basin biyaan ka sa imong partner tungod sa daghang mga ‘apan’ nga imong nakita sa kaugalingon. Ang maong matang sa pagbati makahatag og daghan nga babag sa imong tinuod nga gugma ug makapapukaw sa daghang mga pagduda.

Ang pagduda maoy hinungdan ngano’ng magbalay-balay ka og mga sugilanon sa imong kaugalingon hangtod nga kini’ng tanan mahimo na nga butang nga imong katuohan bisan pa kun wa’y basehan ang tanan.

Ang selos kun mapasagdan mahimo’ng makabungkag og relasyon ug ang labi’ng gikahadlokan, mo-angin og kinabuhi.

 Email: [email protected] or [email protected]