EDITORYAL - Sigarilyo way pagkaupos

“Sigarilyong di maubos” usa sa mga linya sa kantang gipasikat ni Ka Freddie Aguilar, nga gititulohan og “Sigarilyo.” Sama sa gitagna nang daan sa sikat nga folk singer ang produktong gikan sa tabako, ang sigarilyo.  Dili pa lang dugay gipasar ang Sin Tax Law ni Presidente Benigno Aquino III, daghan sa mga nananom niini og tabako ug ang mga kompanyang naghimo og sigarilyo ingon man mga bino ang mireklamo kay lagi makulban kuno sila og kaldero ug uban pa.

Sa pagpirma ni Aquino niini, siya miingon nga ang makolektang buhis magamit sa pagpalambo sa health services sa gobiyerno ngadto sa katawhan, samtang tinuod dunay kalamboan nga makita sa mga barangay health clinics, wala niini matangtang sa bisyo sa pagpanigarilyo. Bisan og nisaka ang presyo niini og dul–an P2 matag stick, duna man gihapoy gipanghimong mga baratuhong brand ang mga manufacturers nga affordable sa mga hinabako.

Wala man mag-ingon ang balaod nga ang tumong mao ang pagpatay sa industriya sa sigarilyo, mao nga nangita usab og pamaagi ang mga pabrika niini nga mohimo og baratuhong brand nga mao na usab karoy gikahiligan sa mga hinabako dihang nisaka ang presyo sa ilang paboritong brand.

Lisod man pud kaayo mohimo og balaod aron mopatay og negosyo kini maoy hinungdan nga nangita usab og paagi ang tighimo og sigarilyo nga magpabiling motapot sa ilang produkto ang mga tawo hangtud nga sila mamatay sa nagkadaiyang sakit sama sa kanser.

Sumala pa sa pagtuon, nagkaanam og kabata ang manigarilyo karon, nagpasabot kini nga sayo usab sila nga mopahulay. Kung ingon niini gihapon ang sistema, kuwangon ra gihapon ang makolektang dugang buhis gikan sa Sin Tax tungod kay sagad sa mga nasakit tungod sa pagsige og sigarilyo kadto mang mga kabus nga dili maka-afford og private hospitals.