Alburoto sa Hong Kong

Tanan nga mata sa kalibotan ang nakatutok karon sa Hong Kong. Kini gumikan sa pag-alburoto karon sa katawhan didto gumikan sa krisis sa pulitika nga mihapak sa usa sa mga sentro sa pinansiyal sa Asya.

Gusto sa katawhan sa Hong Kong nga sila gayud mismo ang mopili sa ila’ng bag-o nga leader sa eleksiyon sa 2017. Samot sila’ng naglagot sa diha’ng, sama sa naandan, pulos mga kandidato sa komunista nga kagamhanan ang ila nga pilian. Apan nagdumili niini ang otoridad didto sa Beijing kinsa miinsister nga ila nga katungod ang pagbutang og mga kandidato alang sa bag-ong lider sa siyudad. Andam gayud ang kagamhanan pagpakgang sa unsa’ng lakang sa katawhan sa Hong Kong.  Kini ang hinungdan sa halapad nga protesta karon. Nasagmuyo ang katawhan sa Hong Kong gumikan sa kapakyas kuno sa saad sa Chinese government paghatag kanila og kagawasan pagpili kun kinsay modala sa pangagamhanan sa siyudad. Sukad pa kaniadto’ng Sabado, liboan ang midagsa sa kadalanan sa Hong Kong aron pagkondena sa kagamhanan kinsa ila’ng giakusar nga padayon nga miyatak sa ila’ng kagawasan, ilabina sa pagpili sa ila nga lider. Ato’ng mahinumdoman nga sa tana’ng rehiyon sa China, lahi ang pamalakad sa Hong Kong. Ang Hong Kong ilalum sa Britanya sulod sa 156 ka tuig. Ug sa diha nga gi-turnover na kini ngadto sa China kaniadto’ng 1997, adunay kasabotan tali sa mga gobiyerno sa Britanya ug China nga ipailalum kini sa prinsipyo “sa one country, two systems.”

Ilalum sa mao nga estilo, adunay dako’ng kagawasan ang katawhan sa Hong Kong nga wala sa mainland. Apan tungod kay kabahin gihapon kini sa China, tuta sa komunista’ng kagamhanan ang chief executive sa Hong Kong. Sa eleksiyon sa 2017, gusto ang katawhan sa Hong Kong nga sila mismo ang mokuha ug mopili sa ila’ng sunod nga lider. Ug adunay showdown karon tungod kay mora’g dili usab magpapiri ang kagamhanan sa Beijing.  Ato’ng nakita karon ang halapad nga protesta sa katawhan nga naglagot sa padayon nga pag-ipit sa ila nga kagawasan. Unsay sangpotanan niini? Ato lamang atangan. Hinuon ato unya nga makita kun unsay katag sa komunista’ng kagamhanan sa China.