EDITORYAL - Pagpanikas sa Incheon

Hapit na mahuman ang Asian games ug nagkanihit ang tsansang madugangan pa ang bulawang medalya nga madala sa mga atletang Filipino gikan sa Incheon, South Korea diin gihimo ang maong kompetisyon sa paugnat sa kusog.

Mas misamot   kagamay  ang tsansa niini tungod kay ang boxing event na lang maoy nahibiling atleta sa Pilipinas nga dunay tsansang makakuha og bulawan, nameligro pa tungod sa gihulagway nga pagpanikas sa mga officials aron padaugon ang mga Koreans.

Ang tanang atleta nga gipadala sa nagkadaiyang mga nasud ngadto sa Incheon pulos preparado ug gigastohan sa ilang tagsa-tagsa ka mga gobiyerno, apan nausik lang tungod sa bati kaayo nga officiating partikular na sa boxing event.

Usa sa klaro kaayong pagpanikas nahitabo sa round 16 dihang gikulata og maayo ni Clark Ian Bautista ang Korean boxer nga si Choe Sangdon, kaduha kini nibarag sa first round, sa normal nga sitwasyon, iphan unta kini ug nagpasabot nga daog na sa maong round si Bautista.

Sa ikaduhang round, napatumba ni Bautista si Choe, ug ning tungora daw di na matago pa ang pagbarag mao nga giiphan sa referee, sa third round, nagkapa-kapa na lang si Choe bisan wala nay klaro kun makaigo ba ug dili, hangtud nga natapos ang duwa.

Nakugang ang katawhang Filipino ug ang mismong mga nanan-aw sa Seonhak Gym kay ang kamot ni Choe maoy giisa sa referee. Ang iskor 3-0, nagpasabot nga bisan usa ka round way gidag-an si Bautista. Tataw kaayo nga gitikasan ang mga Filipino.

Dili lang ang Pilipinas maoy gitikasan, ang Thai ug Indian boxers susama usab og nahiaguman. Kining ingon niini nga matang sa officiating sa mga international matches maoy nakaguba sa unta maayong tumong sa paugnat sa kusog.