Daghang buslot

Niatubang na g’yud sa imbestigasyon sa senado si PNP Chief Alan Purisima uban sa daghang heneral sa PNP.

Apan makapatinga’ ngano’ng wa’ niya gi-uban si Deputy Director General Felipe Rojas ug Director Carmelo Valmoria, ang pangulo sa National Capital Region Police Office. Daghan ang nagduda nga basin gipugngan ang duha aron dili madahig sa kontrobersiya sa ilang lider, labi pa nga sila ang mga sumusunod kun o galing matangtang sa katungdanan si Purisima tungod sa mga akusasyon nga iyang giatubang. Ug bisan sa iyang pag-atubang sa senado, wa’ kini hingpit makahanaw sa daghang mga pagduda sa iyang kaligdong.

Husto ang pasangil ni Purisima nga basin gihimo ang pagdaot kaniya sa mga tawo nga naapektahan tungod sa iyang kusganong kampanya alang sa kalinaw ug kahapsay sa nasud.

Usa na niini ang mas estrikto’ng pagkuha og lisensya sa mga armas ug mas gipalapdan nga operasyon batok sa ilegal nga drugas ug kidnapping. 

Basin tuod husto ang pagduda ni Purisima. Apan dili kini igo nga depensa aron motabon sa mas nanimaho niya’ng katigayunan nga karon niani og daghang mga pagduda.   Sa iyang sweldo, ngano’ng nakapalit siya og daghang katigayonan ug nakapatukod ug mahalong balay ug nakaangkon og luho nga mga sakyanan.

Yano’ng tubag ni Purisima nga napalit kini niya sa panahon nga bag-o pa lang siya sa katungdanan ug iya ning naangkon sa mas barato’ng presyo.

Pananglit ang iyang mahalon nga SUV iyang nakuha sa mas ubos kaayong presyo nga kapin usa lang ka milyon itandi sa presyo niini nga mokabat og P3 ngadto P4 milyones.  Husto ang pangutana ni Senador Grace Poe. Kun adunay tawo nga motanyag nimo og butang sa mas barato nga presyo, di’ kaha ka mangutana ngano’ng iya ning gihatag nimo sa mas ubos nga kantidad?

Ug kun ligdong kang lider o tawo, di’ kaha ka magduda unsay bugti sa pabor nga iyang gihatag nimo?  Ang pangatungdanan sa gobiyerno nagbase sa usa ka lig-on nga pundasyon—ang integridad. Sa tanang higayon mao unta kini ang gitan-aw ni Purisima aron di’ madudahan ang iyang pagkatawo.

Karon, mas daghan ang nagduda kun unsay pabor nga gipangayo niadto’ng tulo ka dagko’ng kontraktor nga nagtinabangay sa pagpatukod sa gitawag nga ‘white house’ sa Campo Crame nga karon maoy gihimong puy-anan ni Purisima.

Daw natuk-an ang pangulo sa PNP sa pangutana ni Senador Serge Osmeña nganong dili ang pagpatukod og mas nindot nga tambalanan alang sa kapulisan ang iyang giuna.  Kining tanan nga mga donasyon sa PNP nitumaw nga wa’ man gani deed of donation nga gikapakita si Purisima.

* * *

Email: [email protected]. or [email protected].