EDITORIAL - Pasahero maoy mabasol?

Angay ba gud nga ang mga sumasakay maoy basulon sa mga drayber kun sila madakpan sa dili pagtuman sa balaod sa tukma nga pagmaneho’g sakyanan?

Si Greg Perez, pangulo sa grupo’ng PISTON-Cebu, miingon nga mapugos sila paglapas sa balaod ug usahay mohunong sila sa “No Stopping Area” kay ang mga sumasakay tua man didto naghuwat.

Apan ngano nga dili man magsabot ang mga drayber nga dili ninyo hunongan ang mga pasahero nga tua mag-atang og kasakyan sa dapit nga dili “PUJ loading ug unloading area?

Kun himuon kini sa mga drayber sa PUJ maisip pa gani nga nakatabang sila sa pag-edukar sa mga sumasakay nga dili maayo ang pagsakay didto sa mga dapit nga “no stopping area.”

Sa ingon niini nga paagi ang pasahero makakat-on og leksyon ug motultol na unya sila sa mga PUJ stopping area. Karon gud nagsalig sila kay aduna may mga drayber sa PUJ nga mopasakay bisan sa dili tukma nga dapit.

Ang nakaapan lang kay samtang may kahugpongan man unta ang mga draybers apan ingon sa wala sila’y tinguha nga hingpit nga motuman sa balaod.

Tungod sa kaabusado sa ubay-ubay’ng mga drayber nga dili motuman sa balaod sa pagmaneho’g sakyanan daghan kanila ang nadakpan ug dagko kaayo ang multahan.

Imbes tagdon sa mao nga mga drayber ang pagbayad sa ilang multa gipasagdan lang hinuon ug nalutsan na sila og bench warrant. Karon, mikupo-kupo na sila ug mangayo kuno’g tabang sa bise presidente. Usa kini sa awhag sa PISTON ngadto sa kagamhanan nga wad-on ug dili na ipatuman ang Bench Warrant. Makiangayon ba gud?