EDITORYAL – Daghan ang nasakripisyo

Dili mga buta ang mga opisyal sa kagamhanan, ilabi na si Mayor Michael Rama, ug sigurado nga inyo’ng nakita ang grabe na kaayo nga problema sa trapiko dinhi sa dakbayan tungod sa kadaghan na sa mga sakyanan.

Dili na gani makapaspas pagdagan ang mga sakyanan tungod sa grabe’ng problema sa trapiko apan ngano’ng tugotan pa man ninyo nga ang kabahin sa karsada sirad-an aron lang himuon nga duwaanan?

Ngano’ng itugot man ninyo nga lipayon ang pipila lang ka pudyot sa katilingban, kining mga adunay bisekleta ug mga skate boards nga malipay luyo sa kahasol sa kadaghanan?

Ang mga karsada gihimo ug gigastohan gikan sa kuwarta sa kagamhanan alang sa mga sakyanan ug dili kay himuon nga duwaanan. Mao man gani nga ang mga tag-iya og sakyanan pabayron og Road Users tax kada tuig.

Kun ang mga opisyal sa kagamhanan dili makabalibad sa hangyo niini’ng mga tawo nga gusto’ng himuon ang karsada nga ilang playground kay mahadlok nga dili unya sila botohan sa sunod eleksyon, angay tingali nga mangita sila og karsada nga dili kaayo agianan sa mga sakyanan.

Dunay dako ug lapad kaayo nga karsada didto sa South Road Properties (SRP) nga daplin sa dagat ug mas maayo pa nga adto sila didto hatagan og higayon gikan sa buntag hangtod kanus-a sila abuton og kaluya pagbisekleta ug pagduwa sa ilang roller skates.

Walay nagpugong sa mao nga grupo pagsakay og bisekleta kay makaayo man kini sa panglawas ug pagduwa gamit ang roller blades ug roller skates, apan ayaw ninyo gamita ang karsada aron sakripisyohon ang kinabag-ang katawhan.