Mas taas ang bakasyon

Samtang gitun-an pa di ba masakripisyo ang mga magbubuhis ug makatabang ba pagpaluag sa trapiko ang paghimong upat na lang ka adlaw sa trabaho sa mga kawani sa gobiyerno matag semana, hagbay rang nagpahimus sa four-day workweek ang atong mga senador ug mga kongresista.

Gituki sa Civil Service Commission (CSC) ang pag-usab sa trabaho sa mga buhatan sa gobiyerno gikan sa Lunes hangtod sa Huwebes o gikan sa Martes hangtod sa Biyernes, sugod sa alas-8 sa buntag hangtod sa alas-7 sa gabii, uban ang usa ka oras nga pahuway sa paniudto. Sa pikas bahin, sud na sa daghang katuigan, mas taas ang bakasyon kay sa trabaho sa atong mga magbabalaod.

* * *

Palihug basaha ning kalendaryo sa mga sesyon sa Senado ug sa House of Representatives. Di kong kabasol nimo kun makahilak sa kalagot nga bisan napapas nang Priority Development Assistance Fund (PDAF) ug nabasura nang Disbursement Acceleration Program (DAP), mas hayahay pa gihapon sa polis ang mga sakop sa Kongreso.

Lunes hangtod sa Huwebes ra ang sesyon sa Senado ug sa House. Alas-4 sa hapon na sila magsugod. Kun way init nga lalis, kasagaran sa mga magbabalaod mamauli na human sa duha o tulo ka oras, may pipila ganing mobiya human sa roll call. Bisan sa kamubo ra sa ilang working hours, duna pa gyoy magsige og palta.

* * *

Nagsugod ang sesyon sa 16th Congress niadtong Hulyo 28, dihang naminaw sila sa State of the Nation Address (SONA) ni Presidente Noynoy Aquino. Ni-adjourn sila niadtong Biyernes, Septiyembre 26, alang sa dul-an sa buwan nga bakasyon.

Mobalik ang sesyon karong Oktubre 20 apan kutob ra sa Oktubre 31. Mobakasyon na sab og tunga sa buwan alang sa Kalag-Kalag. Nobiyembre 17 na mobalik ang sesyon apan hangtod ra sab sa Disyembre 19. Dul-an na sab sa buwan ang ilang bakasyon sa Pasko ug Bag-ong Tuig. Mobalik ang sesyon sa Enero 19 apan kutob ra sa Marso 20. Nga sundan og dul-an sa duha ka buwan nga bakasyon. Mag-sesyon sila gikan sa Mayo 4 hangtod sa Hunyo 11. Ug mobakasyon na sab hangtod sa sunod nga SONA sa Hulyo 27 sunod tuig.

* * *

Dul-an sa tunga sa tuig ang bakasyon sa mga kongresista ug mga senador. Minilyon ka pesos sa atong buhis ang gigasto sa inadlaw nilang sesyon. Maayo unta kun ikapasigarbo ang kalidad ug kamakahuloganon sa ilang mga balaudnon.

Sa 15th Congress, duha ra ka balaod ang napasar: Ang nasudnong budget sa 2014 ug ang pag-uswag sa piniliay sa Sangguniang Kabataan (SK) aron mapaubos og tukmang kausaban. Napupos na lang ang lugway ug natakda na lang ang piniliay sa SK sa Pebrero sunod tuig, wa pay kausaban nga nasabotan ang mga magbabalaod.

 [email protected]