EDITORYAL - Pagpananom og kahoy

Nakatutok karon ang mga mata sa mga Filipino didto sa Mindanao tungod sa gitinguha niining pag-ilog sa Guinness World Record nga kinadaghanang punoan sa kahoy nga dungan nga gitanom sugod niadtong adlaw nga Biyernes.

Ang "TreeVolution," nagtinguhang lupigon ang 1.9 milyon nga gitanom nga kahoy nga kasamtangang gikuptan sa India. Plano sa mga taga Mindanao nga makatanom og 4.6 milyones ka mga kahoy.

Usa kini ka maayong sumbanan sa ubang mga probinsya sa Pilipinas karon nga nag-atubang ang tanan sa kabangis sa epekto sa Climate Change.

Sumala pa sa Department of Environment and Natural Resources lapad nga bahin sa rainforest sa Pilipinas ang nangaupaw na tungod sa kaingin, development ug land conversion.

Base sa uwahing report, ang dul-an na og 4 milyones ka mga kahoy ang natanom Biyernes pa lang sa gabii nga pag-ihap. Klaro na nga naapsan na sa Mindanao ang record sa India, apan hangtud nga walay opisyal nga pahibalo gikan sa Guinness World of Records, dili pa maangkon sa Pilipinas ang titulo.

Si Presidente Benigno Aquino III misaad nga sa iyang termino nga motanom og 1.5 bilyon ka punoan sa kahoy sa 1.5 milyon ka ektaryang yuta gikan sa tuig 2011 hangtud sa 2016.

Ang mga susamang kalihokan maoy angay nga buhaton matag tuig, kinahanglan lang nga aktibo ang gobiyerno sa pagdasig sa publiko pagpananom og mga kahoy ug pahugtan ang pagpanakop ug pagdili sa pagpamutol og kahoy.

Mas maayo nga ang tanang graduating class sa tanang school levels, gikan sa elementarya, high school, kolehiyo, pribado man o publiko i-require pagpananom og kahoy.

Minilyon ka mga bata ang mogradwar matag tuig, nagpasabot kini nga minilyon ka punoan sa kahoy ang madugang sa kalasangan.