Dili kita magpatulis

Dili baya talagsaon ang kaso ni Capitol Security Officer Loy Anthony Madrigal sa pakiglambigit niya sa iyang minyo nga sekretarya.

Komon ang maong kaso ug husto lang si Gobernador Hilario Davide III sa iyang desisyon pag-awhag nila ni Madrigal ug sa iyang sekretarya nga mo-resign sa ilang trabaho.

Bahala na kun unsay ilang buhaton basta malibre ang kagamhanan sa lalawigan gikan sa mga komentaryo sa katawhan.

Samtang dili usab sayop ang lakang ni Mayor Michael Rama nga pabutangan g’yud og security guard ang mga buhatan sa LBC Express ug ang uban pa nga establisemento nga nakatilaw na og tulis o wala pa.

Ang security guard maoy numero uno nga depensa sa usa ka establisemento ug ikaduha lang ang CCTV camera ug ang  mga kawani.

Busa importante kaayo ang guwardiya kay mao kini ang una nga makigsangka batok sa mga  dautang tawo nga manamastamas sa usa ka balay patigayon.

Tungod kay napakyas ang LBC Express sa paghimo’g lakang alang sa ilang kasiguroan, gikorehian sila sa mayor nga maoy amahan sa dakbayan sa Sugbo.

Sa tulis nga nahitabo sa sanga’ng buhatan sa Avon sa Talisay, kun wala pay guwardiya tingali mameligro unta ang kinabuhi sa mga kawani.

Busa dalaygon ang lakang ni Mayor JVR pagmandar nga paguwardiyahan ug may CCTV usab ang mga  balay patigayon sa Talisay, kay walay manulis kun walay magpatulis. ([email protected])