EDITORYAL - Respeto sa balaod

Katungod sa mga tawo ang pagmugna og tagsa-tagsa nila ka grupo kay gilatid kini sa atong Konstitusyon. Apan ang atong batakang balaod wala maglatid nga ang mao nga grupo makamugna og kaugalingon nila nga balaod.

Ang grupo nga Alimaong, nga nag-ila sa ilang kaugalingon nga kaliwat sa mga lumad nga Sugboanon, gani usahay mangangkon nga anak sila ni Lapu-Lapu, gusto nga dili sila mapaubos sa balaod nga gipatuman dinhi sa nasud.

Magdala-dala ang uban kanila og mga armas bisan walay lisensya kay nagtuo sila nga katungod sa ilang grupo ang pagdala og armas bisan og walay papeles. Dili kuno sila angay’ng dakpon kay lahi sila og balaod nga gisunod.

Diha nga girespondehan sa mga polis kay adunay mipahibalo nga adunay mga armadong tawo didto sa Barangay Agsungot, nakigpinusilay ang mao nga grupo sa kapolisan.

Resulta, usa kanila napatay sa mga polis. Nagsul-ob pa og sapot ang napatay nga sama tan-awon sa sapot sa militar. Diha’y higayon nga usa ka sakop niini nga grupo, gidakop sa mga sakop sa Land Transportation Office (LTO) didto sa Punta Princesa kay nakahimo’g kalapasan, dili magpadakop.

Nangangkon ang gidakop nga kun pamultahon g’yud siya ang mobayad sa multa mao ra si Presidente Noynoy Aquino.

Diha nga ang giila nga headquarters sa Alimaong diha sa Busay gironda sa mga sakop sa National Bureau of Investigation (NBI) kapin sa 10 ka tuig na ang milabay, daghang armas ang nakuha.

Katungdanan tingali sa lider niini nga grupo nga motuman sila sa balaod aron respitohan usab sa katawhan ang ilang pundok.