Balay ug panimalay

Alang ni Carl Jung ang balay ug panimalay nga mga hulagway diha sa damgo ang pagaisipon nga Mansion of the Soul. Daghan  mga analysts ang nidason sa maong pamahayag niya. Ang balay nisalamin sa panlantaw o pagbati sa tag-iya niini. Nagtuo ako nga ang pagdesinyo sa imong puloy-anan kinahanglang muhaom sa imong panginahanglang sikolohikal, espirituwal ug emosyonal. Kini tungod kay dako kaayo og kalambigitan ang imong palibot sa imong panlawas ug sa imong pagkatawo sa kinatibuk-an. Tahas ug hagit sa matag arkitekto ang pagpangutana sa buot mahitabo sa pumupuyo sa balay nga ilang pagahimoon. Gani, dunay niduol nako usa ka adlaw niana aron magpatabang sa iyang problemang emosyonal. Usa sa mga gisugyot nako mao man ang pag-usab sa han-ay ingon man pintal sa iyang lawak. Dili to feng shui apan dako ko og pagtuo nga bisan gani ang han-ay sa mga butang sulod sa imong lawak ang makaapekto sa imong disposisyon. Diha sa kalibutan sa damgo, mahinungdanon kaayo nga imong hatagan og igong gibug-aton ang mga mensahe nga nagpahipi  sa ilang paglugwa diha sa imong paghikatulog.