Pagdaginot sa kompaniya

Dear Atty. Divine,

Nagtrabaho ko sa usa ka kompaniya apan karon gusto sa company nga tangtangon ang among departamento kay cost cutting kuno sila. Ang akong pangutana attorney kon mahimo ba ko nga papahawaon lang sa rason nga nag-cost cutting sila? Nagplano ang among kompaniya nga ibalhin mi nila og laing departamento, mahimo ba ko nila nga i-terminate kon dili ko mobalhin sa laing department? Nagduda man gud ko nga dunay laing rason ang kompaniya sa ilang pagtangtang sa among department. Unsa may maayo nako nga buhaton? Hinaut nga imong matubag ang akong mga pangutana. - Rina

Dear Rina,

Ang kompaniya dunay katungod nga modesisyon kon unsay makaayo sa ilang operasyon. Mao nay gitawag og “ management prerogative” nga diin dili manghilabot ang gobiyerno kon unsaon pagpadagan sa mga kompaniya ang ilang operasyon. Gitugotan usab ang employer sa pagsagop og mga pamaagi aron sila makaminus sa gasto sa ilang operasyon. Basi sa Labor Code, kon ang empleyado tangtangon tungod sa cost cutting, legal kini apan kinahanglan nga mobayad ang kompaniya og separation pay. Buot ipasabot nga mahimong manaktak og empleyado ang kompaniya tungod sa cost cutting. Apan kon pananglitan ibalhin ka sa laing departamento tungod sa pag-dissolve sa imong department apan dili ka motuman mahulog kana nga Insubordination ug mahimo kanang kabasihan sa pagtaktak  kanimo sa trabaho. Busa ang maayo nimo nga buhaton mao ang pagtuman sa mando sa imong kompaniya apan kon sa  imong tan-aw gipiit ka na sa imong employer, mahimo ka nga modangop sa DOLE or NLRC ilabi na kon gipalagpot ka nga way igong hinungdan. Thanks and God Bless. - Atty. Divine