Pagkamatinud-anon

Adunay panultihon sa iningles pa, “ Honesty is the best policy.” Sa ato pa, ang pagkamatinud-anon maoy labing maayo nga gikinahanglan. Usa kini ka hiyas sa tawo nga ang kabililhon niini, molabaw pa sa bulawan. Nagtubod kini sa kahiladman sa atong pagkatawo. Tinubdan kini sa kaayo nga walay nagpahipi nga katahap sa pagpaka-aron –ingnon, aron pahimuslan ang dili iyaha.

Dili katugot nga mahugawan ang konsensya. Mas gusto niya malipay ang uban kay sa palabihon ang iyang kaugalingon. Madinayganon nga mopahinumdom sa katarong nga baruganan. Malipayon siyang makaalagad sa isig ka tawo. Walay gipinig ngadto ni bisan kinsa o unsa man siya. Walay luna sa iyang kasingkasing ang gugmang salingkapaw.

Mopadasig sa mga nawad-an og paglaum. Motanyag og pagtabang alang sa kasulbaran niadto nga naa naghambin sa hilabihang kawad-on. Mahimut-anon nga makigsalo sa iyang naangkon nga katigayonan. Mahinangpon sa mga tawo nga nanginahanglan kaniya. Apan maantigo usab kini mokilatis sa buot mopahimulos sa iyang pagkamaalagaron.

Dato siya sa kabubut-on nga walay pag-ihap sa iyang kahago. Basta lang matinud-anon siya, bahala’g maalkanse. Kay kalipay niya nga makapalipay sa uban, nga makatagamtan usab sa kinabuhing mapuslanon ug malipayon. Aron pagpaamgo nga samtang may kinabuhi, may kahayag pa ang kaugmaon. Mapanagan-on siya sa mga butang nga makapahuyang sa iyang pagkatawo.

Pagkaanindot kon kini ang atong himoong giya sa pagpakabuhi. Tugob sa kalipay nga nagminahalay,nga gipalig-on diha sa pagsalig sa kahitas-an.