Paghiusa sa Guadalupe Seniors

Ang bag-ong napili nga presidente sa Federation of Senior Citizens Associations of Guadalupe nga si Novio Brovo gusto g’yud nga mahiusa ang tanang seniors sa ilang barangay.

Iya kini nga gipasabot atol sa among panaghinabi sa programa Senior Citizens Hour sa dyRC, nga mabati matag Sabado gikan sa alas 5 hangtod alas 6 sa gabii.

Naglaom si Brovo nga magkasabot unta ang ubang mga chapter presidents, aron makab-ot ang maong tinguha. Gani matud niya nga kon mahiusa lang (ambut nganong dili) wala na kinahanglana pa ang federation. Ang laing upat ka pundok sa mga senior citizens sa Guadalupe, gipangulohan nila ni Carmen Gabucan, Val Olandria, Lauro Salaber, ug Emilia Arbon. Si Brovo mipasabot nga dili kinahanglan nga siya ang mahimong presidente sa maong hiniusang kahugpongan.

Mao usab kini ang tinguha ni Chit Lugo sa Barangay Apas, diin matud niya, uyon siya sa tinguha ni Brgy. Captain Ramil Ayuman nga hiusahon ang duha ka pundok sa mga senior citizens sa ilang barangay.

Matud ni Chit, dili kinahanglan nga siya ang ma-presidente. Problema lang kay dili man gusto ang iyang mga sakop sa panaghiusa.

Sa iyang bahin, si Kapitan Michael Gacasan sa Guadalupe naninguha usab nga mahiusa ang lima ka pundok sa mga senior citizens sa iyang barangay. Gani, karon ang lima ka presidente adunay kaugalingong mga desks sa barangay, ug ang tanang pundok naka-avail sa one percent nga gahin sa barangay alang kanila. Sa ato pa, wala mamolitika si Kapitan Gacasan.

Gawas sa atong gihisgotan dinhi, ang ubang mga barangay nga adunay duha ka chapters, naglakip sa Bacayan, Banilad, Bo. Luz, Cogon- Ramos, Hipodromo, Lorega-San Miguel, Mabolo, Pahina Central, Parian, Sambag I,  San Roque, Talamban,  Zapatera.

Ang uban pa mao ang Bonbon, Bulacao, Calamba, Cogon-Pardo, Duljo Fatima, Inayawan, Kalunasan, Kinasang-an, Labangon, Pahina San Nicolas, Pasil, Pta. Princesa, Tisa, ug Toong.

Murag dili lisud ang paghiusa sa duha ka chapter. Daku og role o kaakohan ang mga kapitan paghiusa sa maong mga pundok. Gawas kon sila ang nakaingon (gumikan sa politika?) sa pagkasiak sa maong mga kapunongan sa ilang barangay.

Ang Kalunasan ug Kamputhaw, adunay 3 ka pundok, samtang ang Capitol Site ug Poblacion Pardo, sama sa Guadalupe, 5.

Maoy atong panghinaut dinhi nga atong ihikling ang personal natong mga intereses ug ambition, alang sa kahiusahan sa mga senior citizens ning dakbayan.

Apan, kon ang tanan gustong mag-presidente, ug ang mga kapitan dili maningkamot paghiusa sa mga senior citizens, morag di g’yud nato makab-ot ang panaghiusa.