Road separator giguba
Isoga sa konseho karon sa Talisay ug sa taga DPWH nga mao kunoy mipaguba sa road separator sa national highway sa Barangay Bulacao sa maong siyudad.
Ang maong road separator gigastohan sa unang administrasyon og P2.5 milyones, ug bisan usa ka sentimos walay natampo ang DPWH niini luyo sa kamatuoran nga ubos sa ilang superbisyon ang maong karsada.
Gituyo sa unang administrasyon ang pagbutang og ali, divider nga semento sa maong highway aron paghapsay sa dagan sa mga sakyanan.
Apan may mga exit points ang maong separator nga sagad maoy lusot-lusotan sa mga bus, awto, traysikol, traysikad ug pedestrian.
Ang giingon nga mipaguba sa kabahin sa maong separator sa miaging Domingo, kadaghan na diay mohangyo sa daan nga konseho bahin sa ilang tuyo, apan wala tugoti kay duol ra niini ang existing nga exit o agianan.
Maayo gani kay naagian kini ni Mayor JVR niadtong Domingo samtang gimaso ang sementado nga separator.
Wala man siya pananghiri niini, gipaimbestigar niya kini kang city administrator John Yre De los Reyes ug sa kapolisan.
Diha nga gisukit-sukit, mitug-an ang maong tawo nga may pagtugot siya sa konseho sa Talisay ug sa DPWH sa pagguba sa road separator. Mahimo ra diay nga mopaguba sila sa mga importanteng proyekto sa siyudad nga dili mopahibawo sa mayor? Daghan ra ba ang nangutana kon wala ba sila makadawat og suburno?
* * *
- Latest
