Guidelines nga wala tumana

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Duna na say nadisgrasyang mga tinun-an tungod sa pagpabaya sa mga magtutudlo sa ilang responsibilidad isip ikaduhang mga ginikanan sa mga bata samtang sila anaa sa ilang poder atol sa tingklase.

Dunay tulo ka mga tinun-an sa Calagasan National High School sa lungsod sa Argao sa miaging adlaw nga nangabanlas sa baha ug gianod padung sa dagat, patay na sila dihang nakaplagan.

Kung gituman lang sa mga magtutudlo ug ilang diniyoson ang pagtuman sa mga pahimangno sa DepEd ug mga local nga disaster risk reduction councils sa ilang lokalidad, dili maingon niini ang mahitabo.

Dunay kamandoan ang DepEd nga kung mahitabo nga maabtan ang mga bata og katalagman diha sa eskuylahan, dili sila mahimong papaulion hangtud nga dili apason sa ilang mga ginikanan o mga hamtong nga kabanay. Kini aron pagsiguro nga sila luwas nga makauli sa ilang tagsa-tagsa ka mga panimalay.

Mahimo usab mabasol ang mga barangay officials kay nasayod man silang dautan ang panahon ug sila’y nakahibalo sa mga danger zones sa ilang mga lugar.

Kung naghimo pa usab sila sa ilang trabaho base sa gipangtudlo kanila kabahin sa disaster mitigation ug disaster risk reduction, nagbutang na unta silang daan og mga tanod o disasters managers sa mga danger zones ilabi na kay tingklase.

Angay unta niadto, duna nay gibutang nga mga tanod sa maong spillway kay oras kadto sa tingklase ug tingpamauli sa mga bata. Samtang ang mga magtutudlo, wala nalang gyud unta nila tugoti nga makauli ang mga bata.

Ngano man gud diay og motawag sila sa munisipyo, sa polis o sa barangay nga magpakuha ang mga bata kay kilom-kilom naman? Nganong isugal man gyud ang safety?

Ang nahitabo hinuon, search and rescue ug retrieval na hinuon sila maayo. Inay nga disaster risk reduction sila mamuhonan og maayo. Pagkaanugon niadtong mga bataa kung wala pa madisgrasya.