EDITORYAL - Silot sa LBC

Human sa sunod-sunod nga pagpanulis sa LBC, gistudyohan sa pangagamhanan sa siyudad sa Sugbo ang temporaryong pagsuspenso sa ilang permit hangtud nga ilang mapahugtan ang seguridad sa ilang mga establisimiyento.

Dili kita makabasol ni Mayor Mike Rama nga makahunahuna niining maong lakang isip silot sa cargo forwarder. Ang pagpanulis sa tulo ka branches sa LBC dinhi sa siyudad, bisan pa og gamay ra ang kuwarta nga nakuha, makapabati sa imahe sa siyudad sa Sugbo. Abi pa lang, puwerte na gayud ka wala’y ayo ang peace and order dinhi.

Dili usab kita makabasol sa siyudad kay nagpabaya pud ang LBC sa seguridad sa ilang mga branches. Wala sila’y security guard. Naa tuod sila’y mga CCTV apan gipawong o naguba ba kaha kini atol sa pagpanulis.

Ang LBC usa ka dako nga kompaniya. Ang ilang mga branches naa sa mga nagkalain-laing lugar sa nasud. Unya dili sila maka-afford og kuha og security guard? Gawas sa cargo forwarding, ang LBC nagnegosyo usab og cash transfer. Ang tag-iya ug ang management nakahibalo nga naay kuwarta ang ilang mga branch. Unya dili nila hatagan og importansiya ang ilang CCTV cameras? Dili nila kini i-check kung nag-andar pa ba?

Daghan kaayong mas gagmay pa nga mga establisimiyento nga hugot ang seguridad. Aduna’y guwardiya ug CCTV cameras. Gani, ang uban duna pu’y mga time lock ug uban pang pasilidad sa pagseguro nga ang ilang mga kabtangan dili madali-dali og kawat, kay lagi, negosyo man.

Tinuod, responsibilidad sa Cebu City government ang pagseguro nga malinawon ug hapsay ang siyudad. Apan responsibilidad usab sa mga negosyante ang pagprotekta sa ilang negosyo.