Ang kampanya sa drugas Subsob

Subsob karon ang kampanya sa kapolisan batok sa gidili nga drugas. Tungod niini daghan ang nadakpan ug napasakaan og kaso.

Minilyon na usab nga kantidad sa gidili’ng drugas ang nasakmit sa kapolisan. Kon kanunay nga ingon ani ang himuon sa kapolisan ug inabagan sa suporta sa katawhan, sa hinay-hinay mapukan ra gayud nato ang suliran sa gidili’ng drugas dinhi sa nasud.

Apan mahimo ra gihapon nga pakyas ang kampanya sa gidili’ng drugas bisan pa sa kadaghan sa mga nadakpan ug ka dako na sa kantidad sa gidili’ng drugas nga nasakmit kon ang tanan dili moresulta sa pagka konbikto sa mga tawo nga nalambigit niini.  

Sigun sa hukmanan nga naghupot sa mga kaso sa gidili’ng drugas halos moabot ngadto sa  90 porsiyento sa mga akusado niini ang gipang- absuwelto tungod sa kapakyas sa mga polis pagsunod sa mga lagda sa pag-aresto, pagkuha, pagpreserbar sa mga ebidensiya ug kapakyas sa mga polis sa pagtunga sa bista sa kaso diin sila ang mga testigos.

Busa ang hagit karon sa kapolisan mao ang pagsiguro nga makonbikto g’yud ang mga akusado aron mahimong epektibo ang kampanya sa gobiyerno batok sa gidili’ng drugas.

Ang paglutos, pagtaral ug pagkonbikto sa mga akusado sa mga kaso sa gidili’ng drugas wala lang usab makadepende sa mga polis. Ang kapolisan ug gobiyerno nanginahanglan usab sa suporta sa katawhan sa pagsulbad ning maong suliran.

Kabahin ang katawhan kun “community” sa gitawag og Five Pillars of Criminal Justice System ug kon kita mosuporta sa kampanya, dinhi ato na tingali nga makab-ot ang dugay na nato’ng gidamgo nga kadaugan batok sa gidili’ng drugas.