Baha ug basura
Kanunay na kita nga makasinati og mga pagbaha tungod sa sagunson nga ulan. Ang mga pagbaha nakahasol sa tanan busa nahimo kining dako nga suliran.
Ang mga magpapatigayon naalarma na usab sa baha tungod kay nakahasol usab kini sa ilang mga negosyo ug sa ubang naglaraw sa pagbubo og puhonan sa dakbayan.
Tungod sa baha daghan ang nagbagulbol ug ang uban kanila mibasol sa lokal nga kagamhanan sa dakbayan sa Sugbo tungod sa kapakyas sa pagsulbad sa nahisgotang suliran.
Pero yuna pa, kinsa ba ang nagmugna sa baha? Gimugna ba sa lokal nga kagamhanan sa dakbayan sa Sugbo ang baha? o ang Kahitas-an?
Ang baha dili mugna sa lokal nga kagamhanan sa dakbayan sa Sugbo ug labi na nga dili kini mugna sa atong Kahitas-an. Ang baha mugna sa katawhan nga wala’y pagpakabana sa iyang palibot ug kalikupan.
Ang baha mugna sa katawhan’g nagpasagad lang sa paglabay sa ilang mga basura ngadto sa mga kanal. Ang baha mugna sa katawhan nga wala’y disiplina ug nagpakabuta-bungol sa ilang nakita ug nadungog nga mga panawagan sa paglain-lain sa mga basura ug sa pagtarong sa paghipos ug paglabay niini.
Busa ang sulbad sa suliran sa baha mao ang kooperasyon sa katawhan ug action sa kagamhanan. Sa laktod, kay tawo man ang nagmugna sa suliran, siya ra usab ang sulbad niini ug ang kagamhanan igo na lang sa pag-ayuda.
- Latest
