Way silotay
May sukaranan nga mahimangod ang mga tagtungod sa nangamatay nga mga pasahero ug mga tripulante sa MV St. Thomas Aquinas nga nalunod human sa panagbangga sa MV Sulpicio Express Siete sa Lauis Ledge sa Sugbo niadtong Agosto 16, 2013 sa sangpotanan sa buwag nga mga imbestigasyon sa trahedya:
Naabtan og kapin sa tuig human sa panagbangga una gipagawas ang sangpotanan sa mga imbestigasyon sa Maritime Industry Authority (Marina) ug Special Board of Marine Inquiry (SBMI);
Ambot pila pa ka buwan o tuig ang paabuton sa mga biktima una maaksiyonan ang mga rekomendasyon sa mga imbestigador; ug
Wa pay bisan usa nga nasilotan, sama nga way bisan usa nga girekomendar nga masilotan.
* * *
116 ka pasahero ug tripulante ang namatay ug 21 ang wa pa igkita hangtod karon. Apan alang sa duha ka hugpong sa mga imbestigador way bisan usa nga manubag sa gidangatan sa mga biktima. Nangamatay ang mga isda ug nahulga ang mga bakhaw sa lapad nga pagkatap sa lana gikan sa nalunod nga barko. Apan alang sa mga imbestigador way kapaninglan sa pagkapilde sa kalikopan ug kaliboan ka mangingisda.
Nakaplagan sa mga imbestigador nga pulos sayop ang mga tripulante sa duha ka nagkabangga nga mga barko. Apan wa sila’y silot nga girekomendar alang sa duha ka kapitan nga silang Rolito Gilo sa Sulpicio Express Siete ug Reynan Bermejo sa St. Thomas Aquinas. Wa sab kaako ang mga imbestigador pagsugyot nga silotan ang mga tagduma sa duha ka higanteng kompaniya sa barko, ang Philippine Span Asia Carrier Corporation (PSACC), ang bag-ong ngan sa Sulpicio Lines Inc., ug 2GO Travel.
* * *
Ang kahuyang sa mga lagda ug katalawan sa gobiyerno pagsilot sa mga responsable sa mga trahedya sa kadagatan labihan kasalawayon kon itandi sa kaisog sa ubang kanasuran pagpatubag sa mga tagduma ug mga tripulante sa madisgrasya nga mga barko sa ilang kadagatan.
Sa atong silingang nasud sa South Korea, nga nagbangotan sa pagkalunod sa barko nga puno sa mga tinun-an sa high school, gikiha ug gipriso dayon ang mga tag-iya ug mga tripulante, gipapas ang coast guard nga nalangay pagtabang sa mga biktima ug nikanaog sa katungdanan ang primero ministro.
* * *
Bisan sa kasubsob sa mga trahedya sa kadagatan, o tungod ba kaha ini, wa mag-apurang gobiyerno pagtarung sa industriya ug pagpatuman sa mga lagda sa luwas nga pagbiyahe aron di na masubli ang mga katalagman. Nahuman ang imbestigasyon Hulyo karong tuiga, 11 ka buwan human sa trahedya. Nagpaabot ang mga imbestigador og laing duha ka buwan pagpagawas sa resulta.
Sa kasamtangan, ang gisugyot nga pagbutang og mga boya sa kadagatan ug pagtukod sa Vessel Traffic System aron paggiya sa mga barko nga moagi sa Lauis Ledge wa pay timaan nga mapatuman.
* * *
- Latest
