EDITORYAL - Mapugngan ba ang krimen?

Ang tibuok nasud mosaulog karong buwana sa National Crime Prevention Month. Daghan ang kalihukan nga giandam sa kadagkoan sa kapolisan ingon man sa ubang ahensya sa kagamhanan.

Apan ang pangutana kon tukma na ba ang atong gipatuman nga mga “crime prevention measures” aron pagpugong nga dili mosaka ang gidaghanon sa crime statistics?

Wala malilong kanato nga kuwang kaayo ang gidaghanon sa kapolisan aron makasanta unta nga mahitabo ang krimen, ilabi na sa mga dagko’ng dapit sama sa dakbayan sa Sugbo.

Ang dakbayan sa Sugbo angay unta nga adunay 1,600 ka polis aron takus nga mobantay sa kapin na sa 800 mil ka lumolupyo, apan ang mga polis subra lang og gamay sa 1,000.

Apan bisan og dugangan pa ang gidaghanon sa kapolisan nga idistino sa usa ka dapit, dili gihapon kini kasiguroan nga mapugngan na ang mga krimen.

Ang pagtumaw sa problema sa ilegal nga drugas diin ang makagamit mawad-an sa maayo nga panghuna-huna usa sa hinungdan nga mahitabo ang krimen.

Kadtong mga drug users nga wala’y ikapalit og drugas ingon man kadtong mga tawo nga nagkutoy na ang mga tiyan tungod kay wala’y gikaon – mapugos sila sa pagpangawat.

Sayon na lang usab kaayo ang pagtinil karon og armas tungod sa wala gayud masumpo nga pagpamuhat og armas diha sa dakbayan sa Danao.

Kon tinuod gayud nga ang kagamhanan seryoso sa tinguha pagpugong nga mahitabo ang daghang krimen, apilon nila pagsulbad ang mga problema nga makaaghat sa katawhan paghimo og daotan.

Ang kapolisan angay usab nga motug-an sa matuod nga statistics ug dili kay tagoan ang ubang report aron ipakita nga milampos sila pagpugong sa pagsaka sa mga krimen.