Trabaho alang sa pusher?

Kusog kaayo ang shabu bisan asang dapita sa nasud karong panahona.

Tungod kay kuwartahan ang mga negosyante niini, dali ra kaayong makapalit og mga dagkong armas aron isukol batok sa mga otoridad.

Gani ang Bohol, usa ka malinawong lalawigan apan  gumikan sa shabu, dali kaayong  nabaniog dihang gipamatay  ang  mga polis sa mga drug dealers.

Hinuon bahin sa mga rebelde, daan na man nga nasayran nga labing isog ang mga rebelde sa maong lugar kay daghan usab nga mga polis ang gipamatay didto.

Maayo unta kun ang masugamak mao kadtong mga polis nga tigpanalipod sa ilegal nga negosyo.

Apan ang nakapait kay ang mga isog man nga mikampanya batok sa shabu maoy nadisgrasya.

Dinhi sa Cebu, mas grabi kadaghan ang mga negosyante og shabu  itandi sa Bohol apan wala kaayo’y polis nga gipatay sa negosyante og shabu.

Ang Talisay City, Cebu nga maoy usa sa mga lugar  nga  unang gihugpaan sa shabu niadtong ulahing mga tuig sa 1970, giingong  mikalma na kuno  karon ang maong negosyo didto kay gipatrabaho  ni  Mayor JVR ang mga pusher.

Tinuod baya tingale, kay ang makapadasig gud sa tawo  nga  mag-drug pusher  kadto mang maglisod na pagpakaon sa iyang pamilya o kaha bisan mismo sa iyang kaugalingon.

Apan mapatrabaho  kaha ni Mayor JVR ang  tanang  drug pusher sa Talisay ?([email protected])