Implikasyon sa seguridad

Laing sanga na ‘sab sa LBC ang gitulis.  Sama sa naandan, wa’ madakpi ang mga suspek.  Gamay ra ang nakuha nga kantidad sa kuwarta.  Wa’y naangol o napagan sa maong insidente. Guba ang ilang CCTV. 

Ug labaw sa tanan, wa’ gihapoy guwardiya ang maong establisemento.  Ang mas pang dakong bulilyaso, susamang sanga sa LBC ang gitulis sa miaging tuig.  Ug susamang mga problema ang giatubang nila.  Ug samang mga kakuwangan lang gihapon ang ilang nasinati sa miaging tuig nga wa’ gihapon mahatagi og kalambuan karon.

Daghang  punto ang mahimo natong ipatigbabaw,  wa’ makat-on ang ilang amo sa sunod-sunod nga tulis (ika-upat na gitulis ang LBC ning tuiga) sa lain-lain ining sanga sa Sugbo.  Ikaduha, basin nakakita sila og maayong paagi sa pagpasikat sa ilang establisemento sa maong matang sa krimen.  Ikatulo, basin gamay ra gyud tuod alang nila ang natulis nga salapi itandi sa ilang kita.  Ug ikalima, mas dako pa siguro ang ilang magasto kung mokuha pa og guwardiya itandi sa ilang kita nga idagan sa mga tulisan.  Apan kun unsa man ang hinungdan nganong wa’ magtiner og security guard ug wa’ ayoha ang ilang nagubang mga CCTV, kutob lang ‘ta sa pagduda.

Apan di’ mahimong kadudahan ang epekto nga hatud sa maong sunod-sunod nga tulis nga nahitabo di’ lang sa LBC apan sa uban pang mga establisemento.  Usa lang ang buot ipasabot ini-- huyang ang atong seguridad. Bisan kun usa lang ka establisemento ang nabiktima sa pagpanulis, dako ning sagpa sa seguridad sa dakbayan nga angayan nga tan-awon pag-ayo.  Kung nahimo sa mga tulisan ang pagbiktima sa usa ka negosyo nga wa’y guwardya, di’ halayong ila ‘sab ning himuon sa uban nga lugak ang seguridad.  Ug alang sa mga negosyante nga nagplanong mobutang og negosyo sa dapit, wa’ pa gani sila makaduaw, niatras nang daan tungod kay dugay rang naguba ang dungog sa usa ka dapit kun seguridad ang hisgutan.

Kinahanglan nga mopalabang og ordinansa ang mga lokal nga kagamhanan nga magmando sa mga tindahan ug mga negosyo nga magtiner og guwardya labi pa kun adunay kalabutan sa transaksyon sa kuwarta ang negosyo.  Di’ mahimong tugtan ang mga negosyante nga magbukas sa negosyo (depende sa gidak-on ug sa matang) nga magbukas kun di’ masiguro ang seguridad sa tindahan.  Hibaw-i nga kun unsa man ang insidente nga mahitabo sama sa tulis ug kawat, di’ lang ang mga trabahante ug mga tag-iya ang apektado, apan ang tanang tawo nga nagpuyo sa dapit nga naningkamot nga magpabilin ang kahapsay ug kalinaw.

Email: [email protected]. or [email protected].