Hapsayon ang karsada

Nindot kaayo ang tinguha ni Vice Mayor Edgardo Labella nga hapsayon ang karsada paingon sa Pasil Fish Port kay karon puwerte’ng samoka anang karsada nga gitawag og General Genis Street ug Belgium Street.

Ang Gen. Genis Street mao kanang karsada nga nahimutang kilid sa Sawang Calero police ug fire station samtang ang Belgium Street mao ang karsada nga nahimutang kilid g’yud sa giguba na nga Pasil Fish Market, atubangan sa simbahan.

Nahukman sa Police Coordinating and Advisory Council (PCAC) nga gipangulohan ni Labella nga himuon na nga “one way” ang Gen. Genis Street alang sa mga  sakyanan nga mopaingon sa fish port.

Unya, kadto’ng mga sakyanan nga gikan na sa fish port, adto na sila motuyok subay sa Belgium Street sa ila na nga paggawas gikan sa Barangay Suba. Sa ingon nga paagi hapsay g’yud tuod.

Apan ang pangutana, mapatuman ba g’yud kaha kini sa mga sakop sa CITOM ug sa mga tanod? Bisan og ang mga kapitan nga sila si Joel Sable (Suba) ug Ariel Yburan (Sawang Calero) mipasalig g’yud nga motrabaho, apan kuwang ko’g pagtuo.

Husto g’yud nga ang mao nga mga karsada dili na paparkingan og sakyanan ang masi’g ka daplin aron dili makapasamok. Apan labaw sa tanan mao nga did-an g’yud ang mga traysikad nga mo-counter flow sa traffic.

Daghan ra ba g’yud sa mga nagmaneho’g traysikad puwerte’ng gahia’g ulo nga dili mopatuo. Tan-awon lang unya nato og unsay labok nila ni Kapitan Sable ug Kapitan Yburan.

Ang akong sagupon mao ang panultihon nga “To see is to believe.” Dili ko mohatag og gibug-aton sa giingon nga “bulahan kadto’ng motuo bisan wala makakita.”

Bitaw, kinsa may ganahan nga moanha sa fish port kon ang karsada puwerte’ng samoka sama sa pagka karon. Husto ra ‘sab nga giguba na lang kadtong isdaan diha atubangan sa simbahan kay puwerte’ng bahoa.

Naluoy tawon ko sa kaparian sa San Nicolas de Tolentino Parish nga sulod sa dugay’ng katuigan wala gayud mobukas sa “main entrance” diha sa dalan Tupas kay puwerte’ng bahoa.

Anha man gud mamarking ang mga trak de karga nga magkarga og isda unya magtulo ang mga lang-og kaayo og baho nga inagos sa isda. Unya panahon sa gabii, aw bisan adlaw, gihimo lang nga ihianan ang main entrance sa simbahan.

Apan kon ang karaang Pasil Fish Market mahimo na nga public plaza sigurado ko nga ang kaparian mobukas na sa ganghaan’g mayor sa simbahan. Dili ba padre?