EDITORYAL - Tax collection hinay

Ang kakuwang og pundo nga salapi sa kagamhanan sa dakbayan sa Sugbo maoy nag-una nga rason ngano nga si Mayor Michael Rama gusto g’yud nga mobaligya og kayutaan diha sa South Road Properties (SRP).

Kon daghan pa og pundo nga kuwarta ang dakbayan wala na’y panginahanglan pa nga mobaligya ang City Hall og yuta sa SRP. Kapin sa P400 milyones ang bayranan sa dakbayan sa utang niini sa Japan sa pag-ugmad sa SRP kaniadto.

Si kanhi kongresista Tomas Osmeña misugyot nga unya na ibaligya ang kayutaan sa SRP kon mosaka na ang presyo pagkahuman sa mga dagkong proyekto sa Filinvest Land Inc. ug SM Prime Holdings Corporation.

Ang argumento ni Osmeña mao nga adunay magamit ang dakbayan paggasto sa scholarship sa mga kabus apan “deserving” nga tinun-an nga mogradwar gikan sa mga public high school sulod sa 20 ka tuig.

Wala malilong kanato nga nanuyhakaw na ang mga dagko kaayo nga hotel ug uban pa nga mga building dinhi sa dakbayan. Nagpasabot kini nga mosaka unta ang koleksyon sa real property taxes.

Apan nakita sa revenue collection sa dakbayan nga ang nakolekta gikan sa real property tax ubos kaayo kon itandi sa business taxes. Ngano man ni? Klaro kaayo nga hinay ang atong koleksyon sa buhis gikan sa kayutaan, mga building ug makinarya nga maoy giisip nga real property units.

Kon gipaspasan pa sa City Treasurer’s Office ang pagpangolekta sa RPT, daghan unta og kuwarta ang dakbayan. Matud sa Bureau of Local Government-Finance (BLGF) nga ang real property tax maoy giisip nga “lifeblood” sa usa ka local government units.