People Initiative vs pork

Gilusad sa mga supak sa pork barrel ang People’s Initiative against pork barrel ug tinguha nila ang pagtigom og minilyong pirma alang niini.

Dinhi sa ato gipangulohan sa simbahang katoliko ang paghimo sa nahisgutang katuyoan samtang mga militanteng grupo ang nanguna niini didto sa kaulohan. Sila nagtoo nga ang pork barrel nagpabilin apan tago lang kini nga gipatuman.

Apan ang Malakanyang miingon nga wala na’y pork barrel tungod kay giwagtang na kini sigon sa mando ni Pangulong Noynoy Aquino busa wala na sila’y angayan pa nga protestahan.

Hinuon maayo kini nga gihimo sa mga kontra sa pork barrel kay kon sila magmalampuson hayan mahimo kini’ng sumbanan sa umaabot ug akong irekomendar kanila ang pagpahigayon usab og Peoples Initiative batok sa political dynasty tungod kay grabe na kini kaayo dinhi sa nasud.

Sa kasayuran sa tanan nga wala pa masayod, ang Peoples Initiative gahum kini sa katawhan nga gilatid sa batakang balaud sa pagpanday og balaud. Kini gitagana alang sa mga panahon nga ang kongreso nga gitahasan sa pagpanday og balaud magdumili paghimo sa ilang mandato. Kauban sa maong gahum mao usab ang referendum.

Ang kontra political dynasty nga probisyon sa atong batakang balaud tiguwang na pero hangtod karon wala pa gihapon kini ngipon busa dili gihapon makapamaak ug kon makapamaak man dili makasamad.

Ang kontra political dynasty nga probisyon sa batakang balaud nanginahanglan og balaud nga ipalabang sa kongreso aron kini mapatuman.

Mao kini ang hinungdan nga wala g’yuy kontra political dynasty nga balaud nga gipalabang ang kongreso tungod kay kon ila kining himuon maunay sila sa tari kon nasabong pa, tungod ang kadaghanan sa mga magbabalaod nagmugna og political dynasty sa tagsa-tagsa nila ka dapit.

Maong haom ug tukma nga akong irekomendar sa mga nagpahigayon og peoples initiative kontra pork barrel ang peoples initiative pud kontra political dynasty.