EDITORYAL - Plaka sa sakyanan

Karong semanaha ipanghatag na sa Land Transportation Office (LTO) dinhi sa rehiyon ang mga plate numbers ngadto sa tag-iya sa kaliboan ka sakyanan nga sa taud-taod nga panahon nagdagan-dagan diha sa karsada nga wala’y mga plaka aron mailhan kon kinsa ang tag-iya sa higayon nga malambigit kini og aksidente.

Ang bag-o nga plate numbers aduna kini duha ka letra ug lima ka numero sama sa YL 12345 alang sa mga motorsiklo ug sa ubang sakyanan nga upat o subra pa ang mga ligid, ang plate numbers tulo ka letra ug upat ka numero sama sa YKR 1000.

Nindot kaayo nga ipang-apud-apod na sa LTO ang mga vehicle plates aron momenus ang gidaghanon sa mga sakyanan nga nagdagan-dagan nga wala’y plate numbers. Apan kasiguroan na ba kini nga ang tanang sakyanan nga magdagan aduna na g’yuy plate numbers?

Kada tuig ang mga sakyanan nga marehestro dinhi sa Central Visayas madugangan gayud og kapin sa 20 mil apan ang kadagkoan sa LTO didto sa Manila napakyas paghimo og tukma nga pagpangandam. Bisan ang mga plate stickers nga sayon ra kaayo himuon nagkuwang sila. Kon mag-renew ka sa rehestro sa sakyanan pabayron ka sa LTO og P50 nga alang sa sticker nga maoy ipapilit sa plaka aron mailhan nga nabag-o na ang rehestro apan wala’y sticker nga ihatag ang LTO. Husto ba gud ni? Dili ba maisip nga palpak gihapon kini ni LTO Chief Alfonso Tan Jr.?

Ang rason nga ang LTO dili makapatuman sa “No Plate, No Travel Policy” kay sila may sad-an nga dili maka-isyu dayon og plaka sa sakyanan.